गढीमाई मेला, रक्त उत्सव (फोटोफिचर)

काठमाडौं। विश्वको सबैभन्दा धेरै वली दिने मेला मानिंदै आएको बाराको बरियारपुरस्थित गढीमाई मेलाप्रति अहिले संसारभर चासो देखिएको छ।

प्रत्येक पाँच वर्षमा लाग्ने गढीमाइ मेलामा बोका, कुखुरा, सुंगुर र राँगाको बली दिने गरिएको छ । यस वर्ष पनि पहिलो दिन शुक्रबार राँगाको बली दिइयो भने शनिबार पंछी र सुंगुरको वली दिइएको छ।

गढीमाई मन्दिर पूर्व साढे दुई बिघामा फैलिएको बधशालामा झन्डै पाँच हजार राँगा बली दिइएको छ । मेला समितिले मार हान्न चार सय तरबारधारीलाई अनुमति दिएको छ। बलिका लागि श्रद्धालुले भाकल गरी ल्याएका राँगा मेला समितिले व्यवस्थापन गरेको हो ।

गढीमाई छेउमा रहेको ब्रम्हस्थानमा बत्ती बलेपछि नरबलि दिने परम्पराअनुसार गढीमाईका धामी दुःखा कछडियाले आफ्नो शरीरको कान, औंलासहित पाँच ठाउँको पाँचै थोपा रगत गढीमाईको नाममा चढाएपछि पञ्चबलि दिएका छन्।

गढीमाईलाई सुरुमा सेतो जंगली मुसा, परेवा, कुखुरा, हाँस र सुँगुरको पञ्चबलि दिएपछि भक्तजनले बलिका लागि लिएर आएका पशु बलि आरम्भ हुने परम्परा छ ।

बलिपछि राँगाको टाउको गाड्न बधशालाको दक्षिणपट्टि ब्रह्मस्थानछेउमा करिब १० फिट गहिरो र एक सय फिट लामो खाल्डो खनिएको छ ।

गढीमाईको दर्शनसहित बलि दिएपछि आफूले चिताएको मनोकांक्षा पूरा हुने विश्वास छ ।

नेपाललगायत भारतको कोलकाता, विहार, उत्तर र मध्य प्रदेश, युपी, बंगाल, पञ्जाब, हरियाणा राज्यबाट भक्तजन राँगा, बोका, हाँस, कुखुरा र परेवाजस्ता पशुपक्षीको बलि दिन आउँछन्।

मेला समितिले यस वर्ष १ करोड ६० लाखमा ठेक्का बन्दोबस्त गरिसकेको छ।

बलि दिएका राँगा लैजान ठेकेदारले बधशाला स्थलमा ट्रक राखेर लगिएको छ । आन्द्राभुँडी गाड्न बधशालाको उत्तरपट्टि खाडल खनिएको छ । आन्द्राभुँडी गाड्न एक ट्रक नुन बधशालामा राखिएको छ ।