काठमाडौ। नेकपा एमालेका अध्यक्ष केपी शर्मा ओलीले संघीयताको विषयलाई थाति राखेर भएपनि निर्धारित समयमा संविधान जारी गर्नुपर्ने बताएका छन्। नेपाल पत्रकार महासंघको प्रतिनिधि मण्डलसँग आफ्नै निवास बालकोटमा भेट गर्दै ओलीले त्यस्तो अवस्थामा संघीयता निर्माणको जिम्मा आयोगलाई दिनु पर्ने बताए ।
‘संघीयता विवाद समाधान हुँदैन भने त्यसलाई थाँती राखेर पनि संविधान निर्धारित समयमा जारी गर्नु पर्छ, ओलीले भने, ”माघ ८ गतेपछि व्यवस्थापिका संसदमा रुपान्तरण हुने संविधानसभाले नै संघीयताको विषयलाई अनुमोदन गर्ने छ ।’
तर संघीयता थाती राखेर संविधान जारी गर्ने विषयलाई एकीकृत नेकपा माओवादी, मधेशी केन्द्रीत दलहरु लगायतले यसअघि नै अस्वीकार गरिसकेका थिए ।
कमभन्दा कम प्रदेश निर्माण गरेर जानु पर्ने धारणा राख्दै आएका एमाले अध्यक्ष ओलीले कातिक १६ गते संविधानसभाको संवैधानिक राजनीतिक संवाद तथा सहमति समितिको बैठकमा नेपाली कांग्रेस र अन्य केही राजनीतिक दलको साझा धारणामा सात प्रदेशको प्रस्ताव गरेका थिए ।
भेटमा ओलीले माघ २२ गतेको समयसीमालाई प्रभावित नगर्ने गरी कार्यतालिका संशोधन गर्नुपर्ने बताए ।
