काठमाडौं। भारतीय प्रधानमन्त्री नरेन्द्र मोदीले नेपाली सेनालाई ‘एएलएच ध्रुव मार्क थ्री’ हेलिकप्टर हस्तान्तरण गर्ने भएका छन्। मोदी दक्षिण एसियाली क्षेत्रीय सहयोग संगठन (सार्क) को १८ औं शिखर सम्मेलनमा सहभागी हुन मंगलबार नेपाल आउँदैछन्। 
हेलिकप्टर हस्तान्तरणका लागि मंगलबार सैनिक मञ्च टुँडिखेलमा विशेष कार्यक्रम आयोजना हुँदैछ। सुरुमा मोदीले हेलिकप्टर प्रधानमन्त्री सुशील कोइरालालाई हस्तान्तरण गर्नेछन् । कोइरालाले प्रधानसेनापति गौरवशमशेर जबरालाई हस्तान्तरण गर्ने नेपाली सेनाले जनाएको छ । विगतमा नेपाल र भारतबीच भएका सहमतिअनुसार उक्त हेलिकप्टर नेपाललाई उपलब्ध गराउन लागिएको हो । सन् २०१२ मा निर्माण भएपछि ग्राउन्ड टेस्ट गरिएको यस किसिमको हेलिकप्टर भारतीय सेनाले आक्रमणका लागि लागि प्रयोग गर्दै आएको छ । उक्त हेलिकप्टर हाइ अल्टिच्युटमा पनि उडाउन सकिन्छ ।
