काठमाडौं। मलेसियामा जारी आइसिसी डिभिजन थ्री क्रिकेट प्रतियोगितामा नेपालले सिंगापुरमाथि १ सय ९० रनले सहज जीत हासिल गरेको छ। प्रतियोगिताको तेस्रो खेलमा ज्ञानेन्द्र मल्ल, सोमपाल कामी र र वसन्त रेग्मी नायक रहे।

सिंगापुर २१ ओभर ४ बलमा ७३ रनमै अल आउट भयो। नेपालका सोमपाल कामी र वसन्त रेग्मीले ४-४ विकेट लिए। २ विकेट अमृत भट्टराईको नाममा रह्यो। निर्धारित ५० ओभरको खेलमा ९ विकेट गुमाउँदै नेपालले २ सय ६३ रन बनाएको थियो।

यसअघि टस हारेर ब्याटिङ गर्न आएको नेपालका लागि उप कप्तान मल्लले १ सय १४ रनको इनिङ खेलेका थिए। पहिलो ओभरको दोस्रो बलमा ओपनिङ ब्याट्सम्यान सुवास खकुरेल शुन्यमा आउट भएपछि मल्ल ब्याटिङ गर्न आएका थिए।

४३ ओभर ४ बलमा आउट हुनुअघि मल्लले १ सय २५ बल खेल्दै १३ चौका र एक छक्का प्रहार गरेका थिए।

नेपालका लागि नरेश बुढाऐरले २९, पारस खड्काले १४, शरद भेषवाकरले २५, बसन्त रेग्मी २१, बिनोद भण्डारीले ८, सागर पुनले २१, सोमपाल कामी र अमृत भट्टराईले ६-६, शक्ति गौचनले ५ रन बनाएका थिए। यसअघि नेपाल बर्मुडालाई पनि ठूलो अन्तरले पराजित गरेको थियो भने पहिलो खेलमा युगान्डासँग पराजित भएको थियो।