काठमाडौं। विवादका कारण पटक पटक स्थगित नेपाली कांग्रेसको भ्रातृ संगठन नेपाल विद्यार्थी संघको ११ औं महाधिवेशनको मिति छैटौंपटक तोकिएको छ । महामन्त्री प्रकाशमान सिंह नेतृत्वको निर्देशक समितिले आइतबार कात्तिक ३० देखि मंसिर २ गतेसम्म महाधिवेशन गर्ने घोषणा गरेको हो । महाधिवेशन स्थगित गरिएको विरोध र नयाँ मिति घोषणाको माग गर्दै पार्टी केन्द्रीय कार्यालयमा एक साता आमरण अनसन बस्दै आएका चार विद्यार्थीले नेताले अनसन तोडेका छन् ।

नयाँ कार्यतालिकाअनुसार कात्तिक २० गतेभित्र महाधिवेशन प्रतिनिधिको अन्तिम सूची तयार पार्नुपर्ने छ । पारी त्यसका आधारमा २०७१ कात्तिक ३०, मंसिर १ र २ गते काठमाडौंमा महाधिवेशन गर्ने जनाएको छ ।
अधिवेशन हुन बाँकी जिल्ला र क्याम्पसलाई कात्तिक १८ भित्र अधिवेशन सक्नसमेत निर्देशन दिँदै विज्ञप्तिमा भनिएको छ, ‘विधि र प्रक्रिया पुर्याइएका तथा अधिवेशन हुन बाँकी रहेका जिल्ला र क्याम्पसको अधिवेशन केन्द्रीय निर्देशन समितिले संयन्त्र बनाई कात्तिक १८ गतेभित्र सम्पन्न गर्ने ।’
६८ जिल्ला अधिवेशन सम्पन्न भएको नेविसंघले जनाउँदै आए पनि अहिलेसम्म ४८ जिल्लाको मात्र प्रतिनिधि टुंगो लागेको छ । यसअघि पाँचौंपटक महाधिवेशन स्थगित भइसक्दा पनि केन्द्रीय क्याम्पस कीर्तिपुरसहित उपत्यकाका प्रमुख क्याम्पसमा अधिवेशन भएको छैन । रामेछाप, चितवन, सिन्धुपाल्चोक, रुपन्देही, बारा, पर्सा, भक्तपुर, ललितपुर, कञ्चनपुरसहित एक दर्जन जिल्लामा विवाद छ ।
आन्तरिक विवादकै कारण नेविसंघको महाधिवेशन यसअघि भदौ २९ देखि ३१, गत जेठ २९ देखि ३१ गतेका लागि तोकिए पनि विशेष कारण देखाउँदै स्थगित गरिएको थियो । त्यसअघि २०७० भदौ २९ देखि ३१ गतेका लागि तोकिएको महाधिवेशन मिति तोकिएको थियो । २०७० वैशाख ६ देखि ८ र २०६९ माघ २७ देखि २९ गतेलाई महाधिवेशनको मिति घोषणा गरिएको थियो । संघको २०६४ जेठपछि महाधिवेशन भएको छैन ।