काठमाडौं। भारतीय गोर्खा सैनिक जीतु राईले इन्चोन एसियाडमा स्वर्ण पदक जितेका छन्। संखुवासभा शितलपाट्टीका राईले एयर पिस्तोलतर्फ ५० मिटरमा स्वर्ण जित्दै भारतलाई स्वर्ण पदक दिलाएका हुन् । जितु पाँच सन्तान छोरा मध्य काँहिला सन्तान हुन् । 
सात वर्षअघि भारतीय सेनामा प्रवेश गरेका राईले यसअघि सुटिङ विश्वकप र राष्ट्रमण्डल खेलमा ५० मिटरतर्फ स्वर्ण पदक जितेका थिए । यसै वर्ष अन्तर्राष्ट्रिय प्रतियोगितामा सात पदक हात परेका छन् ।
उनले आइतबार १० मिटर पेस्तोलतर्फको टिम खेलमा कास्य पदक प्राप्त गरेका छन् । सन् २०१६ मा रियो दि जेनेरियामा हुने ओलम्पिकका लागि राई छनोट भएका छन् । एशियाड स्वर्ण जितेपछि भारतको उत्तर प्रदेश सरकारले राईलाई ५० लाख भारतीय रुपैया दिने घोषणा गरेको छ ।
पिताको पदचिन्ह पछ्याउँदै राई सेनामा भर्ना भएका हुन् । उनले ब्रिटिस गोर्खा सैनिकका लागि पनि आवेदन दिएका थिए । ‘तर ब्रिटिस गोर्खाको छनोट प्रक्रिया शुरु हुनु एक दिन अघि नै भारतीय सेनामा छनोट भए,’ मेडल जितेपछि इन्डियन एक्प्रेससँग कुरा गर्दै राईले भनेका छन् । राई गोर्खा इलाभेन्थ रेजिमेन्ट लखउनमा कार्यरत छन् ।
