एन्फा कप: सेना सेमीफाइनलमा

नेपाली प्रहरीलाई पराजित गर्दै नेपाली सेना एन्फा कप फुटवलको सेमीफाइलनमा प्रवेश गरेको छ । दशरथ रंगशालामा बिहीबार भएको खेलमा सेनाले अर्को विभागीय टोली प्रहरीलाई २–० ले पराजित गरेको हो । सेनाका लागि ३३ औं मिनेटमा नवयुग श्रेष्ठले अग्रता दिलाएका थिए भने ७२ औं मिनेटमा दीपक गुरुङले अन्तर दोब्बर बनाएका थिए । सेमीफाइनलमा सेनाको भिडन्त संकटा क्लब र मोरङ एघारबीचको विजेतासँग हुनेछ । सेमीफाइनलको चौथो टोली हुनका लागि दुवैबीच शुक्रबार खेल हुने छ । यसअघि झापा एघार र सशस्त्र प्रहरी बल (एपीएफ) क्लब सेमीफाइनलमा प्रवेश गरी सकेका छन् । ८ टिमको सहभागिता रहेको प्रतियोगिताको विजेता टोलीले १० लाख रुपैया हात पार्ने छ भने उप विजेताले ५ लाख पाउने छ । त्यसैगरी सेमीफाइनलमा प्रवेश गर्ने टोलीले एक लाख रुपैया पाउने छन् ।