प्रहरी हतियार खरिदमा घोटाला: मूल्यभन्दा दोब्बर बढी भुक्तानी

नेपाल प्रहरीका लागि २ करोड ७४ लाख रुपैयाँमा इटालीबाट किनिएको हतियारलाई वास्तविक मूल्यभन्दा दोब्बर बढी रकम तिरेको फेला परेको छ । यो प्रकरणमा १ करोडभन्दा बढी रकम अतिरिक्त भुक्तानी गरिएको अन्नपूर्ण पोष्टले मुख्य समाचार छापेको छ ।

सो समाचारमा भनिएको छ- अन्नपूर्ण पोस्टलाई प्राप्त हतियार खरिदसम्बन्धी कागजातअनुसार इटालीको बेर्रेटा कम्पनीमा बनेकाे १२ बोर सर्टगनलाई प्रतिथान २३ सय ७० अमेरिकी डलर(२३ हजार ७ रुपैयाँ‌) तिरिएको छ । जम्मा सय थान सर्ट गनका लागि सरकारले २ लाख ३७ हजार अमेरिकी डलर(२ करोड ३७ लाख रुपैया) तिरेको छ । ती हतियारको वास्तविक मूल्य प्रतिथान १ हजार ३८ अमेरिकी डलर पर्छ । सोही लटमा खरिद गरिएको ९ एमएम पेस्तोलमा पनि बजार मूल्यभन्दा बढी तरिएको छ। प्रतिथान ६ सय अमेरिकी डलर पर्ने सो पेस्तोललाई ७ सय ५८ रुपैयाँ भुक्तानी दिइएको छ । स‌विधानसभाको निर्वाचन गराउन तत्कालीन प्रधान न्यायाधीश खिलराज रेग्मीका अध्यक्षतामा गठित मन्त्रिपरिषदले प्रहरीका लागि सो हतियार खरिद गर्ने निर्णय गरेको थियो। र‍ेग्मीको पारिवारिक नाताभित्र पर्ने व्यापारी दीपक भट्टको फर्मलाई मात्रै सूचीकृत गरी प्रतिस्पर्धालाई बाटो बन्द गरेर हतियार खरिद प्रक्रिया अघि बढाइएको थियो । मुल्य र खरिद प्रक्रिया मिलाउन नसक्दा ती हतियार २६ दिन भन्सारै अलपत्र परेको अन्नपूर्ण पोस्टले जनाएको छ ।