संसदीय समितिले बुधबार सभापति पाउने

मिनि ससद भनेर संसदीय समितिहरुले दस महिनापछि बुधबार नेतृत्व पाउने भएका छन् । संसद सचिवालयले समिति सभापति चयनका लागि बुधबार बेलुकी ५ बजे निर्वाचन गर्ने कार्यतालिका सार्वजनिक गरेको छ । व्यवस्थापिका–संसदको कार्यसञ्चालन नियमावलीमा संसदअन्तर्गत १० वटा विषयगत, एक विधायन र एक संसदीय सुनुवाइ विशेष समिति गरी १२ वटा समितिको चुनाव बुधबार हुन लागेको हो ।
व्यवस्थापिका–संसद मंगलबार बिहान १० बजेदेखि बेलुका ५ बजेसम्म उम्मेदवारी दर्ता गर्ने समय तोकिएको छ ।
दलहरुबीच समितिहरुको भागबण्डा भैसकेको छ । जसअअनुसार मध्ये ४–४ वटाको नेतृत्व कांग्रेस र एमाले, २ वटामा एमाओवादी, राप्रपा नेपाल, मधेसवादी दल र साना दलमध्ये एकले एक–एक सभापति पाउने छन् ।
संसदीय सुनुवाइमा कुलबहादुर गुरुङ, उद्योग वाणिज्य तथा उपभोक्ता हितमा भीष्मराज आङदेम्बे, राज्य व्यवस्थामा दिलबहादुर घर्ती र कृषि तथा जलस्रोतमा गगन थापाले कांग्रेसले सभापति बनाउने भएको छ ।
एमालेको भागमा परेको अर्थ समितिमा प्रकाश ज्वाला, सुशासन तथा अनुगमन समितिमा शेरधन राई, विकासमा रविन्द्र अधिकारी र महिला, बालबालिका, जेष्ठ नागरिकमा रञ्जु झा सभापतिको रुपमा अघि सारेको छ ।
एमाओवादीको भागमा परेका दुई समितिमध्ये लेखा समिति सभापतिमा जनार्दन शर्मा चयन भइसकेका छन् । अन्तर्राष्ट्रिय सम्बन्ध तथा श्रम समितिको नेतृत्व प्रभु साहले गर्ने छन् । राप्रपा नेपालले सुशीलकुमार श्रेष्ठले सामाजिक न्याय तथा मानवअधिकारमा सभापति बनाउने भएको छ ।
मधेसवादी दलका तर्फबाट फोरम लोकतान्त्रिकका जनकराज चौधरीले वातावरण संरक्षणकोे नेतृत्व गर्ने तयारी भएको छ । विधायन समितिको नेतृत्व साना दलका तर्फबाट एक नेताले गर्ने सहमति भए पनि साना दलबीच सहमति कायम हुन बाँकी नै छ ।