तनहुँ । कुनै समयमा जनताको दु:खसुखमा साथ दिँदै विकास र शान्तिका आश्वासन दिँदै हिँड्ने तनहुँकी पूर्व सभासद् हसिना बेगम यतिबेला आफैँ प्राकृतिक विपद्बाट प्रभावित बनेकी छिन् ।
सेती नदी कटानले घरमा धाँजा फाटेपछि शुक्लागण्डकी नगरपालिका वडा नं ३ निवासी बेगम अहिले त्रिपालमुनी दिन बिताउन बाध्य भएकी छिन् ।
नदी कटानले ३४ घर जोखिममा पारेपछि नगरपालिका कार्यालयले पञ्चमुनि उच्चमाविको खाली रहेको करिब पाँच रोपनी जग्गामा पाल टाँगेर १७ जना परिवारलाई स्थास्तानान्तरण गरेको छ ।
नदी कटानबाट जोखिममा परेकामध्ये १७ परिवारलाई सुरक्षित स्थानमा सारिएको र बांकीले भने आफन्तको शरण लिएको पूर्व सभासद् बेगमले जानकारी दिइन् ।
सोही स्थानमा चुरा पोते बिक्री गरेर जीविकोपार्जन गर्दै आएकी पूर्व सभासद् बेगम अहिले बेलचौतारास्थित देवरको घरमा सामान राखेर त्रिपालमुनि बस्दैछिन् ।
सरकारले यहाँको समस्या समाधानका लागि दीर्घकालीन योजना बनाउनुपर्ने उनले बताइन् ।
पूर्व सभासद् हसिना बेगम २०६४ सालमा नेकपा एमालेबाट सभासद् भएकी थिइन् ।
