दुई नयाँ प्रजातिका जनावर सार्वजनिक

काठमाडौं – नेपालमा पहिलोपटक क्वाक र चेङ्गु नामले चिनिने दुवै प्रजातिका जनावर पत्ता लगाइएको छ । राष्ट्रिय प्राकृतिक संरक्षण कोषले शुक्रबार ललितपुरमा पत्रकार सम्मेलन गरेर दुई नयाँ प्रजातिका जनावर भेटिएको जनाएको छ । अनुसन्धाताहरूले अन्नपूर्ण संरक्षण क्षेत्रको उपल्लो क्षेत्रमा यी जनावर फेला पारेका हुन् । यी दुवै जनावर हिमाली क्षेत्रमा पाइने स्पष्ट भएको छ ।
कोषका अधिकृत मधु क्षेत्रीले स्थानीय भाषामा क्वाक र चेङ्गु नामले चिनिने दुवै प्रजातिलाई असार ९ र १२ गते पत्ता लगाइएको जानकारी दिए । यी दुवै जनावर लामो समयदेखि नेपालमा रहिआएको भए पनि कुन स्थानमा र कहाँ रहन्छ भन्ने यकिन भने भएको थिएन । यी दुई प्रजातिको पहिचानले नेपालमा उपलब्ध स्तनधारी जनावरको सङ्ख्या अब २ सय ११ पुगेको पुगेको छ । दुवै जनावरलाई क्यामेरा ट्रयापिङका माध्यमले फेला पारेको हो । अन्तर्राष्ट्रिय रुपमा संकटमा परेको प्रजातिमा नपरे पनि केही देशले भने यसलाई दुलर्भ प्रजातिमा राखेको छ ।