बेलायतमा साङपाङ देउराली समाजको भेला सम्पन्न,क्याप्टेन बसन्त राईको नेतृत्वमा समिति गठन

लन्डन । बेलायतमा भोजपुरको षडानन्द नगरपालिकाअन्तर्गत साङपाङ देउराली समाजको भेला सम्पन्न भएको छ । शनिबार २ अगस्टका दिन अल्डरसटस्थित माइतीघर रेस्टुरेन्ट समाजको भेला भव्यताका साथ सम्पन्न भएको हो ।

भेलामा नेपालको गाउँबाट आएर बेलायतको विभिन्न क्षेत्रमा बसोबास गर्दै आएका साङपाङ दाजुभाइ, दिदीबहिनी तथा चेलीहरूको उपस्थिति थियो । ज्येष्ठ नागरिक ९० वर्षीय रनबहादुर राईको उपस्थितिले भेला विशेष र महत्त्वपूर्ण बनेको आयोजकको भनाइ छ ।

बेलायतमा रहँदा र गाउँघरमा आइपर्ने समस्यालाई समेत ध्यानमा राख्दै के-कस्तो सहयोग आदानप्रदान गर्न सकिन्छ भन्नेबारे छलफल भएको थियो । सोही विषयलाई मध्यनजर गर्दै भेलाले क्याप्टेन बसन्त राईको अध्यक्षतामा सात सदस्यीय समिति गठन गरेको छ । समिति उपाध्यक्षमा विनायक राई, कोषाध्यक्ष हरि गिरी, इन्चार्ज चन्द्र घले, सहइन्चार्ज संगीता राई तथा सल्लाहकार सदस्य अम्बिर राई र रुद्र तामाङ रहनुभएको छ ।

समिति गठनपछि मनोरञ्जनात्मक कार्यक्रम भएको थियो । तोम्बला खेल्नुको साथै विभिन्न नेपाली चर्चित गीतहरूमा नाचगान गरेर सहभागीहरू रमाएका थिए । सबै जनाले भरपुर मनोरञ्जन गरे भने एकअर्कामा दुखसुख साटासाट पनि गरे । मध्याह्न १२ बजे सुरु भएको कार्यक्रम बेलुकी ११ बजे सम्पन्न भएको थियो ।

भेलाले कार्यक्रम तयारी गर्ने समूह चन्द्र घले, विनायक राईलगायतलाई धन्यवाद ज्ञापनसमेत गरेको थियो ।