एनआरएनए यूके चुनाव : हालसम्म १ हजार ६९५ मत खस्यो

लन्डन । गैर आवासीय नेपाली संघ (एनआरएनए) यूकेको नयाँ नेतृत्व चयनका लागि जारी निर्वाचनमा उत्साहजनक मतदान भइरहेको निर्वाचन समितिले जनाएको छ ।

प्रमुख आयुक्त रामशरण सिमखडाले शनिबार दिउँसो फेसबुक लाइभमार्फत निर्वाचन अपडेट सुनाउनुहुँदै उत्साहजनक रुपमा मतदान भइरहेको जानकारी दिनुभएको हो । उहाँका अनुसार दिउँसो १:१५ मा १६९५ अर्थात् झन्डै ५० प्रतिशत मतदान भएको जानकारी गराउनुभयो । एनआरएनए यूकेमा भेरो भोटिङमार्फत शनिबार मध्यरात १२ बजेदेखि मतदान सुरु भएको हो । मतदान आज बेलुका १० बजेसम्म खुला रहने निर्वाचन समितिले जनाएको छ । जम्मा मतदाता संख्या ३५ सय १ रहेका छन् ।

नयाँ कार्यसमितिका लागि अध्यक्षमा तीन, दुई खुला उपाध्यक्षमा चार, स्कटल्याण्डबाट प्रतिनिधित्व गर्ने उपाध्यक्षमा दुई, महासचिवमा दुई, दुई सचिवमा तीन, इंग्ल्याण्ड राज्य परिषद् अध्यक्षमा दुई र तीन आइसीसी सदस्यको लागि चार उम्मेदवार चुनावी मैदानमा छन् । अध्यक्षमा राजेन्द्र पुडासैनी, मनिष खत्री र गोविन्द खरेल प्रतिस्पर्धा गर्दैहुनुहुन्छ ।

खुला उपाध्यक्षमा डा रक्षा थापा, शम्भुप्रसाद अर्याल, उज्ज्वल कार्की र ज्ञानेन्द्र आले, महासचिवमा पुण्य रेग्मी र दिवाकर पाण्डे, सचिवमा डिएन खराल, भूपाल कार्की र कृष्ण देवकोटा, इंग्ल्याण्ड परिषद अध्यक्षमा अहिल्या कुँवर र राममाया विष्ट तथा आइसीसी सदस्यमा तुंगभद्र भुषाल, देउमान इजम, छविलाल अर्याल र विष्णु खरेल उम्मेदवार रहनुभएको छ । निर्वाचन समितिले मध्यरातसम्ममा नतिजा घोषणा गर्ने तयारी रहेको जनाएको छ ।