दाता सम्मेलन सफल ः प्रम कोइराला

काठमाडौँ, ११ असार । प्रधानमन्त्री सुशील कोइरालाले असार १० गते सम्पन्न ‘नेपालको पुनःनिर्माणका लागि अन्तर्राष्ट्रिय सम्मेलन’ सफल भएको बताएका छन् ।

शुक्रवार बिहान प्रधानमन्त्री निवास बालुवाटारमा भूकम्पपीडित नेपालीको सहयोगार्थ प्रधानमन्त्री दैवी प्रकोप उद्धार कोषमा रकम प्रदान गर्न आएका टोली र सञ्चारकर्मीसामु उनले सो कुरा बताएका हुन् ।

सो अवसरमा प्रधानमन्त्री कोइरालाले सम्मेलनमा कुन रुपमा सहभागिता हुन्छ र कसरी सम्पन्न हुन्छ भन्ने चासोका बीचमा आयोजित सम्मेलन अत्यन्त सफल भएको बताए । उनले सम्मेलनमा विभिन्न मुलुक र दातृ निकायहरुबाट उच्चस्तरीय प्रतिनिधिमण्डलको सहभागिता भएको बताउँदै सबैले यस्तो अकल्पनीय विपद्को घडीमा नेपाललाई सक्दो सहयोग गर्न आह्वान गरेर नेपालको विकास प्रयासलाई सार्थक तुल्याउन सहयोग गरेको उल्लेख गरे ।

प्रधानमन्त्री कोइरालाले दातृ सम्मेलनमा सहयोगको प्रतिबद्धता राम्रो आएकामा सन्तोष व्यक्त गर्दै पुनःनिर्माणको काम वर्षायाम सकिएपछि सुरु हुने बताए ।

उनले अब बन्ने बस्ती भौगर्भिक रुपमा सुरक्षित धरातलमा बसाउनुपर्ने, भवनहरु भूकम्प प्रतिरोधी हुनुपर्ने, सम्पूर्ण बस्ती, सडक, ढल, पानी, बिजुली, टेलिफोनजस्ता पूर्वाधारले सम्पन्न हुने गरी बनाइने पनि बताए ।

“हामीले ठूलो चुनौतीलार्ई सामना गरेका छौँ,” प्रधानमन्त्री कोइरालाले भने – “अब नयाँ आधुनिक र समृद्ध नेपालको निर्माण आरम्भ हुनेछ ।”

प्रधानमन्त्री कोइरालाले संविधान निर्माणको कार्य प्रक्रियामा गएको उल्लेख गर्दै संविधान छिट्टै आउने समेत बताए ।