एनआरएनए यूकेका अध्यक्ष मगर नेपाल प्रस्थान, कार्यवाहकको जिम्मेवारी मल्ललाई

लन्डन । गैर आवासीय नेपाली संघ (एनआरएनए) बेलायतका अध्यक्ष प्रेम गाहा मगर नेपाल प्रस्थान गर्नुभएको छ ।

अध्यक्ष मगर मे ३ देखि ५ सम्म काठमाडौंमा हुने एनआरएनएको एकता महाधिवेशनका लागि बिहीबार नेपाल जानु भएको हो । उहाँले आफ्नो अनुपस्थितमा कार्यवाहक अध्यक्षको जिम्मेवारी उपाध्यक्ष अनिल मल्ललाई दिनुभएको छ ।

गैर आवासीय नेपाली संघ बेलायतको १३ अप्रिल २०२५ मा सम्पन्न पहिलो कार्यसमिति बैठकले अध्यक्ष प्रेम गाहामगरको अनुपस्थितिमा उपाध्यक्ष मल्ललाई कार्यवाहक अध्यक्षको रुपमा नियुक्त गर्ने निर्णय सर्वसम्मत रुपमा पारित गरिएको हो ।

कार्यवाहक अध्यक्ष मल्लले अध्यक्ष मगर नेपाल भ्रमणबाट नफर्किँदा संघको सम्पूर्ण नेतृत्व र जिम्मेवारी सम्हाल्ने बिहीबार जारी विज्ञप्तिमा उल्लेख छ । अध्यक्ष मगरले आफ्नो अनुपस्थितिमा पनि संस्थाको कार्य सञ्चालन निरन्तर, व्यवस्थित र प्रभावकारी रुपमा अगाडि बढ्ने विश्वास व्यक्त गर्नुभएको छ ।