गैरआवासीय नेपाली र नागरिकताका बारेमा छलफल हुँदै

लण्डन । सेन्टर फर नेपाल स्टडिज (सिएनएस) युकेले आयोजना गर्दै आएको ‘नेपाल डायलग युके’ मासिक वेविनारमा यसपटक गैरआवासीय नेपाली र नागरिकताका बारेमा छलफल हुने भएको छ ।

अप्रिल ५ तारिखका दिन बेलायतको स्थानीय समयअनुसार बिहान १० बजेदेखि ११:३० बजेसम्म जुमबाट सञ्चालन हुने सो छलफलको विषय ‘गैरआवासीय नेपाली र नागिरकताको प्रश्न: नेपालले कसरी विश्वव्यापी परिवेशबाट फाइदा लिन सक्ला ?’ राखिएको छ । सो छलफलमा बेलायतको लिड्स विश्वविद्यालयका अन्तर्राष्ट्रिय कानुनका प्राध्यापक सूर्यप्रसाद सुवेदी, नेकपा एमालेका स्थायी कमिटीका सदस्य डा राजन भट्टराई र स्वतन्त्र अनुसन्धाता डा मीना पौडेल सहभागी हुनुहुने सिएनएस युकेले जनाएको छ ।

प्राध्यापक सुवेदीसित गैरआवासीय नेपालीहरुको अभियानको शुरुवातबाट नै नीति तथा विचार निर्माणमा सक्रिय सहभागी हुनुभएको अनुभव छ । त्यस्तै, जवाहरलाल नेहरु विश्वविद्यालयबाट विद्यावारिधि गर्नुभएका भट्टराईले लामो समय नेकपा एमालेको विदेश विभागको प्रमुखका रुपमा काम गर्नुभएको छ भने बेलायतको न्यूक्यासल विश्वविद्यालयबाट विद्यावारिधि गर्नुभएका डा पौडेल प्रवासन (माइग्रेसन) का बारेमा गहिरो रुचि राख्नुहुन्छ ।

छलफलमा वक्ताहरुले आफ्नो प्रस्तुति दिनुका साथै सहभागीहरुको जिज्ञासाको पनि जवाफ पनि दिनुहुने छ । छलफलमा भाग लिने चाहनेहरुले जूम लिंक https://us06web.zoom.us/j/86235798097 मार्फत सो छलफलमा सहभागी हुन पाउने आयोजकहरुले बताएका छन् ।

सिएनएस युकेले सन् २०२५ को शुरुवातदेखि हरेक महिनाको पहिलो आइतबार बिहान १० बजे प्राज्ञिक तथा अन्य व्याबहारिक विषयहरुमा प्रवचन र छलफल आयोजना गर्दै आएको छ ।