गण्डकी प्रदेश सांसद गुरुङ नेपाली दूतावास लन्डनमा

लन्डन । बेलायत भ्रमणमा रहनुभएकी गण्डकी प्रदेशसभा सदस्य सरस्वती गुरुङ नेपाली दूतावास लण्डन पुग्नुभएको छ ।

सांसद गुरुङले २३ जनवरीमा लन्डनस्थित नेपाली दूतावासमा पुग्नुभएको हो । उहाँले बेलायतका लागि नवनियुक्त नेपाली राजदूत चन्द्रकुमार घिमिरेसँग भेटवार्ता गर्नुभयो । भेटमा राजदूत घिमिरेसँग उहाँले बेलायतमा रहेका नेपालीको समस्या समाधानका लागि पहल लिइदिन आग्रह गर्नुभएको थियो ।

नेपालको उत्पादन बेलायतमा ल्याएर बेच्नेहरूलाई दूतावासले सहजीकरण गरिदिनुपर्नेमा पनि सांसद गुरुङले जोड दिनुभएको छ । त्यस्तै नेपाली आमाहरूमा रहेको भाषाको समस्यामा दूतावासले ध्यान दिनुपर्ने, दूतावासमा धेरैभन्दा धेरै हेल्प डेस्क राखेर छिटो समस्या सुन्ने वातावरण बनाउनुपर्ने, नेपालबाट बेलायत आएर काम गर्नेहरूलाई भेला गरेर उनीहरूका समस्या सुन्ने र समाधानमा सहजीकरण गर्नसमेत दूतावासलाई आग्रह गर्नुभएको छ ।

राजदूत घिमिरेले नेपालीहरूलाई परेका समस्या समाधानको पहल गर्ने प्रतिबद्धता जनाउनुभएको छ । भेटका क्रममा दूतावास नियोग उपप्रमुख विपिन दुवाडी, काउन्सिलर लक्ष गुरुङलगायतको पनि उपस्थिति थियो ।