खैरेनी सेरोफेरो परिवार बेलायतको वार्षिक भेटघाट सम्पन्न

लण्डन । खैरेनी सेरोफेरो परिवार बेलायतको वार्षिक भेटघाट सम्पन्न भएको छ ।

डिसेम्बर २२ मा लण्डनको ग्रीनहील आर्मी वेलफेयर सेन्टर वुलवीचमा सम्पन्न सो भेटघाटको अध्यक्षता लेफ्टिनेन्ट रिटायर्ड कृष्णबहादुर गुरुङले गर्नुभएको थियो भने सन्चालन चन्द्रादेवी गुरुङले गर्नुभएको थियो ।

कार्यक्रममा परिवारका सदस्यहरू निर्मला राना र कमला रानाको आमा पार्वती राना (मास्टर्नी आमा), अर्का सदस्य काजी गुरुङको श्रीमान पाइलट क्याप्टेन चेतबहादुर गुरुङ, समाजका पूर्व सचिव राजेन्द्र रानाको छोरा रेमन रानाको निधनमा एक मिनेट मौनधारण गरिएको थियो ।

यस्तै, समाजका सदस्यहरूले हासिल गरेको विभिन्न उपलब्धिहरूमा हार्दिक बधाई पनि दिइएको थियो । जसमा घर खरिद गरेकोमा परिवारकी चेली हमा रन्जितकार, सदस्य जसुधा गुरुङको छोरा बिहान गुरुङ, आफ्नै अकाउण्टेसी फर्म शुरु गरेकोमा एल्सा गुरुङ र सुधीर गुरुङ, साउथ इष्ट लण्डन तमुधिँको अध्यक्ष हुनुभएकोमा प्रेमबहादुर गुरुङ र धर्मपत्नी लक्ष्मी गुरुङलाई बधाई तथा शुभकामना दिइएको थियो ।

कार्यक्रममा ४ वर्षदेखि ९९ वर्ष सम्म उमेर समूहका सहभागी भएका थिए । कार्यक्रममा समाजको आर्थिक विवरण पनि सुनाइएको थियो ।

कार्यक्रमको अन्त्यमा कार्यक्रम सम्पन्न गर्न सहयोग गर्ने सबैलाई अध्यक्ष कृष्ण गुरुङले धन्यवाद दिएका थिए ।