बेलायतमा एक सातादेखि नेपाली विद्यार्थी बेपत्ता, खोजी गरिदिन अभिभावकको आग्रह

लन्डन । अध्ययनका लागि बेलायत आएका एक नेपाली विद्यार्थी एक सातादेखि बेपत्ता छन् । युनिभर्सिटी अफ वेष्ट इंग्ल्यान्डमा एमबीए अध्ययनरत मोरङ सुन्दरहरैचा-७ गोठगाउँ घर भएका २४ वर्षीय सचिन भट्टराई गएको एक सातादेखि सम्पर्कविहीन हुनु भएको हो । गत शनिबार नोभेम्बर १६ तारिख साँझ सवा ८ बजेतिर काम सकेर निस्किनुभएका उहाँ त्यसयता सम्पर्कमा नआएको परिवारले जनाएको छ ।

सो राती डेरामा नफर्केपछि उहाँसँगै बस्ने साथी, स्पन्दन वाग्लेले आइतबार उहाँको परिवारलाई र सोमबार प्रहरीलाई खबर गर्नुभएको थियो । गत सेप्टेम्बर २१ मा मात्रै लन्डन आएका सचिन दुई महिना हुन नपाउँदै बेपत्ता हुँदा परिवार चिन्तित छ । उहाँको खोजीको पहलस्वरुप बेलायत प्रहरीमा पनि रिपोर्ट गरिसकिएको छ ।

यूके ब्रिस्टोलको मार्स्टन रोड बस्ने सचिनले स्थानीय डोमिनोज पिज्जामा काम गर्दै आउनुभएको थियो । उहाँलाई पित्तथैलीमा पत्थरीको समस्या रहेको तर अन्य कुनै स्वास्थ्य समस्याहरुबारे जानकारी नभएको उहाँनिकट स्रोतले जनायो । सचिनको परिवारले उहाँको खोजीमा सहयोग गरिदिन बेलायतस्थित नेपाली समुदायलाई आग्रह गरेको छ ।

“उच्च शिक्षा हासिल गर्ने उद्देश्य लिएर दुई महिना पहिलेमात्रै बेलायत पुगेको छोरा बेपत्ता भएको समाचार सुन्दा हामी छाँगाबाट खसेजस्तो भएका छौं । हाम्रो छोराको वस्तुस्थिति पत्ता लगाई दिन हामी ब्रिटिस प्रहरी, लन्डनस्थित नेपाली दूतावास तथा बेलायतस्थित नेपाली समुदाय एवं संघसंस्थाहरुलाई हार्दिक आग्रह गर्दछौं,” सचिनका पिता शशिकान्त भट्टराईले भन्नुभयो ।

लन्डनस्थित नेपाली दूतावासका कार्यवाहक राजदूत बिपिन दवाडीले पनि भट्टराईको वस्तुस्थिति पत्ता लगाउन दूतावासले सक्दो प्रयास गरिरहेको बताउनुभयो । ब्रिस्टल प्रहरीले खोजी कार्य जारी राखेको बताइएको छ ।

सचिनबारे कुनै जानकारी भए वा उहाँलाई भेटे बेलायती प्रहरी वा उहाँकै कोठामा बस्ने साथीको मोबाइल नम्बर 07570734432 मा खबर गर्न आग्रह गरिएको छ ।

नेपाल सम्पर्क: +977 9816317102 / +977 9842283286