आरजीएनएसको कार्यकारी नेतृत्व लिलादेवी गुरुङलाई हस्तान्तरण

लन्डन । रोयल बरो अफ ग्रीनवीच नेप्लिज सोसाइटी (आरजीएनएस) को कार्यकारी नेतृत्व लिलादेवी गुरुङलाई हस्तान्तरण गरिएको छ ।

प्लमस्टिडमा सोमबार आयोजित कार्यक्रममा यसअघिका कार्यकारी अध्यक्ष पुण्य रेग्मीले एक वर्षे कार्यकाल पूरा गरी सोमबार गुरुङलाई कार्यकारी कार्यभार हस्तान्तरण गर्नुभएको हो । गत वर्ष सम्पन्न अधिवेशनबाट निर्वाचित अध्यक्ष गुरुङले आगामी एक वर्ष संस्थाको नेतृत्व सम्हाल्नुहुनेछ ।

उहाँले आफ्नो एक वर्षे कार्यकालमा संस्थालाई अझ सक्रिय र समावेशी बनाउने प्रतिबद्धता व्यक्त गर्नुभएको छ । यसअघि भूतपूर्व गोर्खाहरुको संस्था जिगेसाको पनि नेतृत्व गरिसक्नुभएकी गुरुङले एनआरएनए यूके महिला सचिव र आईसीसी सदस्यलगायतका जिम्मेवारी पनि निर्वाह गरिसक्नुभएको छ ।

महासचिव ह्यारी गुरुङले सञ्चालन गर्नुभएको कार्यक्रममा आरजीएनएस पूर्वअध्यक्ष एवम् ग्रीनवीच बरो मेयर जीत रानाभाट, संस्थापक अध्यक्ष कुमार श्रेष्ठ, सल्लाहकार मोहन गुरुङ, जिगेसा अध्यक्ष हरिकुमार मल्ल, तमुधिं साउथ इष्ट आमा समूह अध्यक्ष बिन्दु गुरुङ, सल्लाहकारहरु एलएन पाण्डे, अर्कराज तिम्सिना, पण्डित निलहरि घिमिरे, सहदेव गिरी, हरिकुमार मल्ल, सुशील प्रजापति, प्रकाश कँडेलका साथै कार्यमितिका उपाध्यक्ष मञ्जु भण्डारी र सुरोज मास्के, कोषाध्यक्ष सोनी श्रेष्ठ, सदस्य रामकृष्ण अर्याललगायतको उपस्थिति थियो ।