क्यान्सर पीडितका लागि धनु गुरुङ्गले गरिन् ९० किलोमिटर साइकलयात्रा

लण्डन । दुई दशकदेखि ह्याम्पशायर फार्नबरो बस्दै आईरहेकी धरान, सुनसरीकी धनु गुरुङ्गले क्यान्सर पीडितहरुका लागि साइकल चलाएर करिब एक लाख रुपियाँ सहयोग संकलन गर्न सफल भएकी छन् । उनले उक्त रकम क्यान्सर परोपकारी संस्था म्याकमिलनलाई हस्तान्तरण गरेकी छन् ।
ब्रिटिस हाट फाउन्डेसद्वारा आयोजित अत्यन्तै जोखिमपूर्ण ९० किलोमिटरको दुरी रहेको साइकल यात्रामा भाग लिँदै उनले सो सहयोग संकलन गरेकी हुन् । साइकल यात्रा लण्डनबाट सुरु भई ब्राइटनमा पुगेर सकिएको थियो । यात्रा पूरा गर्न करिब ६ घण्टा ३० मिनेट लागेको उनले बताइन् । यात्रा पूरा गर्न पाउँदा आत्मसन्तुष्टी र खुशी मिलेको बताउदै गुरुङ्गले आफ्नो जीवनकालभर क्यान्सर पीडितहरुका लागि अझै उत्साहजनक कार्यहरुमा भाग लिएर उनीहरुको घाउमा मलम लगाइरहन प्रयास गर्ने अठोट व्यक्त गरिन् ।
क्यान्सर रोगका कारण बाल्यवस्थामा नै आफ्नो आमालाई गुमाउनुको पीडाले सताइरहने र आमाको संझनामा हरेक बर्ष क्यान्सर रोगसग सामना गरिरहेका पीडितहरुलागि हौशला बढाउन सोच आइरहने पनि उनले बताइन् ।
उनले केही वर्ष अघि पनि क्यान्सर पीडित बालबालिकाहरुका लागि रकम संकलन गर्न दश हजार फिटमाथिबाट ‘स्काइडाइभिङ जम्प’ गरेकी थिइन् । सो कार्यबाट संकलित रकम क्यान्सर, संगठन नेपाललाई सहयोग गरेको उनले बताइन् ।
आफुले गरिरहेको अभियानहरु सफल बनाउन सहयोग गर्ने सबैलाू उनले कृतज्ञता ब्यक्त गरेकी छिन् ।