बेलायती राजा चार्ल्सको तस्वीर अंकित नोट जुनमा आउने

लण्डन । बेलायती राजा चार्ल्स तृतीयको तस्वीर अंकित भएको नोट आगामी जुनमा बजारमा आउने भएको छ ।

बैँक अफ इंग्ल्याण्डले राजा चार्ल्सको तस्वीर भएको मुद्रा प्रकाशन गरिसकेको र बजारमा ल्याउन तयारी हुँदै गरेको जनाएको छ । बैँकका अनुसार चार्ल्सको तस्वीर बेलायतमा उपलब्ध सबै मूल्यका नोटहरुमा प्रकाशन गरिएको छ । जसमा ५, १०, २० र ५० पाउण्ड रहेका छन् । तर बैँक वातावरणीय र आर्थिक पाटोलाई हेर्दै अहिले पुराना नष्ट गर्नुपर्ने नोटहरुलाई प्रतिस्थापन गर्न मात्र राजा चार्ल्सको तस्वीर भएको नोट छापेको बताएको छ ।

यसअघि बैँकले राजा चार्ल्सको राज्यारोहणका बेला ५० लाख बराबरको ५० पेन्सको सिक्कामा उनको तस्वीर प्रकाशन गरेको थियो ।