राजकीय जिम्मेवारीमा फर्किए प्रिन्स विलियम

लण्डन । श्रीमतीको शल्यक्रियापछि उनलाई रेखदेख गर्न बिदामा बसेका राजकुमार विलियम बुधबारदेखि शाही जिम्मेवारीमा फर्केका छन् ।
पिता राजा चाल्र्समा क्यान्सर देखिएपछि उनी पूर्व निर्धारित समयभन्दा अगावै जिम्मेवारीमा फर्केका हुन् ।
राजा चाल्र्स सोमबारदेखि क्यान्सरको उपचारमा छन् । उनी लण्डनस्थित राजदरबारभन्दा बाहिर साण्ड्रिङघममा रहेका छन् । पिता एक्कासी क्यान्सर निदानका लागि लाग्नुपर्ने भएपछि विलियमले थप राजकीय जिम्मेवारी पाएका छन् ।
४१ वर्षीय राजकुमार विलियमले यसअघि आफ्नी पत्नी राजकुमारी केट र तीन छोराछोरीको हेरचाहका लागि सार्वजनिक कार्यक्रम स्थगित गर्नुभएको थियो ।
राजा स्वास्थ्य उपचारमा लाग्नुभएपछि उहाँको जिम्मेवारी राजकुमार विलियम, रानी कमिला, राजकुमारी एन र कान्छा भाइ एडवार्डले मिलेर सम्हाल्ने अपेक्षा गरिएको छ । माइला भाइ आन्ड्रयूलाई भने अमेरिकामा यौन शोषणको अभियोग लागेपछि शाही जिम्मेवारीबाट केहीवर्ष अघि नै अलग गरिएको छ ।
७५ वर्षीय राजा चाल्र्सलाई कुन प्रकारको क्यान्सर भएको छ भन्नेबारे केही बताइएको छैन, यद्यपि उनको प्रोस्टेटमा क्यान्सर नभएको प्रष्ट पारिएको छ ।
बेलायतका प्रधानमन्त्री ऋषि सुनक, प्रतिपक्षी दलका नेता सर किअर स्टामर लगायत बेलायती जनताले राजाको शीघ्र स्वास्थ्यलाभको कामना गरेका छन् ।