बेलायतका राजामा देखियो क्यान्सर

लण्डन । एक साताअघि मात्र अस्पतालबाट डिस्चार्ज भएका बेलायतका राजा चार्ल्स तृतीयमा क्यान्सर देखिएको छ ।

बेलायतको राजदरबार बकिङघम पालेसले सोमबार साँझ एक प्रेस विज्ञप्ति जारी गर्दै राजामा क्यान्सर पाइएको र आजैदेखि उपचार शुरु गरेको बताइएको छ ।

गत साता पोस्टेटको शल्यक्रिया गराएका राजा चार्ल्समा पाइएको क्यान्सर प्रोस्टेटको भने नभएको विज्ञप्तिमा खुलाइएको छ तर कुन अंगमा क्यान्सर देखिएको हो भन्ने चाहिँ बताइएको छैन ।

क्यान्सरको उपचार चलुन्जेल राजा चार्ल्स कुनै पनि सार्वजनिक समारोहमा उपस्थित नहुने तर कार्यालयबाट भने काम जारी राख्ने पनि जनाइएको छ ।

७५ वर्षीय राजा चार्ल्स प्रोस्टेटको शल्यक्रियापछि तीन दिन अस्पताल बसेर गत सोमबार मात्र घर फर्किएका थिए । त्यही प्रोस्टेटको उपचारका क्रममा उनमा क्यान्सरको शंका लागेपछि थप जाँच गर्दा उनमा क्यान्सर देखिएको बताइएको छ । राजा चार्ल्सलाई भेट्न अमेरिकामा रहेका उनका कान्छा छोरा ह्यारी चाँडै बेलायत आउने तय भएको छ तथापि राजदरबारले भने राजाको अवस्था चिन्ताजनक नभएको आशय विज्ञप्तिमा बताएको छ ।