नेपाली मूलका हरि बुढा र प्रदीप कारन्जितलाई बेलायतमा प्रतिष्ठित अवार्ड

लण्डन । बेलायतलाई कर्मथलो बनाइरहेका नेपाली मूलका दुई युवाले बेलायतको प्रतिष्ठित अवार्ड जितेका छन् ।

एसिएन मिडिया ग्रुपले सन् १९९९ देखि प्रदान गर्दै आएको जीजीटू अवार्डबाट अफगानिस्तानको लडाइँमा दुवै खुट्टा गुमाएका पूर्व गोरखा सैनिक हरि बुढा मगर र हाल बेलायतको स्वास्थ्य सेवा न्याशनल हेल्थ ट्रष्ट नर्थवेष्ट एङ्गिला क्षेत्रको उपमहाप्रबन्धक प्रदीप कारन्जितले सो अवार्ड पाएका हुन् ।

बेलायतमा जातीय अल्पसंख्यक समुदायका नेतृत्व तथा कुशाग्र क्षमताका व्यक्तिहरूलाई सो अवार्ड दिइने गरिएको छ । सो अवार्ड पाउनेहरूको सूचीमा वर्तमान ब्रिटिश प्रधानमन्त्री ऋषि सुनक समेत रहेका छन् । उनलाई जीजीटू ह्यामर अवार्ड दिइएको थियो । तथापि अवार्ड थाप्न उनी उपस्थित भएनन् ।

उता हरि बुढा मगरलाई भने जीजीटू अचिभमेण्ट थ्रु एडभर्सिटी अवार्ड प्रदान गरिएको छ । बेलायतमा सामाजिक र परोपकारी क्षेत्रमा सक्रिय बुढा अहिले सगरमाथा आरोहरणको तयारीमा छन् ।

बेलायतको मात्र नभई विश्वमै कहलिएको बेलायतको स्वास्थ्य सेवाको उपल्लो पदमा पुगेका प्रदिप कारन्जितले भने सो अवार्ड आफू एक्लैले नभई समग्र टीमले नै लिने बताएका थिए । उनी उपप्रमुख कार्यकारी अधिकृत रहेको नर्थवेष्ट एङ्गिला एनएचएस ट्रष्टलाई जीजीटू एनएचएस ट्रष्ट अफ द इयर अवार्ड दिइएको छ ।

सो अवसरमा जातीय अल्पसंख्यक समुदायबाट विभिन्न क्षेत्रमा उत्कृष्ट क्षमता प्रदर्शन गरेका र नेतृत्व क्षमता देखाएका विभिन्न संस्था र व्यक्तिहरूलाई पनि सम्मानित गरिएको थियो ।