गोरखा नगरपालिकाका मेयर, उपमेयर बेलायतमा

लण्डन । बेलायतको रसमोर काउन्सिलसित मितेरी सम्बन्ध रहेको नेपालको गोरखा नगरपालिकाका मेयर, उपमेयरसहित टोली बेलायत आइपुगेको छ ।
आज उहाँहरुसहितको छ सदस्सीय टोलीलाई बेलायतको हिथ्रो विमानस्थलमा रसमोर बरो काउन्सिलका पदाधिकारीहरुले स्वागत गरेका थिए । विमानस्थलमा काउन्सिलर जीव बेल्बासे, काउन्सिलका हेड अफ डेमोक्रेसी आन्ड्रयू कोल्भर र अधिकृत अलिस्टर मुर्डोक पुगेका थिए ।
बेलायतमा आउने नगरपालिकाको टोलीमा मेयर कृष्णबहादुर राना, उपमेयर मसलीमाया थोकर, मेयरकी श्रीमती बच्चुदेवी राना, वडाध्यक्षत्रय रामबहादुर खड्का, दिलबहादुर थापा र प्रदीप कुँवर रहेका छन् ।
उहाँहरु भोलि रसमोरका मेयरले आयोजना गर्ने मेयर च्यारिटी बलमा सहभागी हुनुहुने रसमोर काउन्सिलका काउन्सिलर जीव बेल्बासेले जानकारी दिनुभयो । यसका साथै उहाँहरुले रसमोर काउन्सिलमा शिक्षा, स्वास्थ्य, फोहोरमैला व्यवस्थापन, सामाजिक सुरक्षा लगायतका कुराहरु कसरी सञ्चालन भइरहेका छन् भन्ने बारेमा पनि जानकारी लिनुहुने बेल्बासेले बताउनुभयो ।
रसमोर र गोरखा नगरपालिकाबीच यसअघि मितेरी सम्बन्ध स्थापित भइसकेकोमा त्यसको पुनरावलोकन पनि गरिने बताइएको छ ।
“उहाँहरुको भ्रमणको उद्देश्य रसमोरका राम्रा अभ्यासबाट गोरखाले लाभ लिने र गोरखाका राम्रा अभ्यासबाट रसमोरले लाभ लिने हो”, बेल्बासेले भन्नुभयो ।
यसअघि पनि गोरखा नगरपालिकाका मेयरको टोली बेलायत आएको थियो भने रसमोरको टोली पनि गोरखा गइसकेको छ ।
गोरखा नगरपालिका टोलीको औपचारिक भ्रमण आजबाट आइतबारसम्म हुने बताइएको छ ।