स्थानीय निर्वाचनमा काँग्रेस फराकिलो अन्तरले अगाडी

काठमाडौँ । नेपालमा सम्पन्न स्थानीय निर्वाचनको हालसम्मको परिणामअनुसार नेपाली काँग्रेस फराकिलो अन्तरसहित अगाडी देखिएको छ ।

यो समाचार तयार पार्दासम्म परिणाम घोषणा भएका ३६० पालिकाहरुमध्ये काँग्रेसले १५९ पालिकामा प्रमुख र १५७ पालिकामा उपप्रमुख जितेको छ भने विगतको स्थानिय निर्वाचनमा सबैभन्दा ठूलो दल भएको नेकपा एमालेले १०५ पालिकामा प्रमुख र १०५ पालिकामा उपप्रमुख पद जितेको छ ।

यसैगरी, नेकपा माओवादी केन्द्रले ७८ वटा पालिकामा प्रमुख र ७८ वटै पालिकामा उपप्रमुख जितेको छ । नेकपा एकीकृत समाजवादीले ५ पालिकामा प्रमुख, ११ पालिकामा उपप्रमुख जितेको छ भने जनता समाजवादी पार्टी नेपालले ४ वटा पालिकामा प्रमुख र ५ वटामा उपप्रमुख जितेको छ ।

धेरैजसो पहाडी क्षेत्रका जिल्लाहरुको परिणाम आइसकेको छ भने अधिक जनसंख्या भएका शहरहरु र तराईका अधिकांश जिल्लामा मतगणना भइरहेको छ । वैशाद ३० गते मतदानमा अवरोध भएका केही मतदान केन्द्रहरुमा आज पनि मतदान भएका छन् ।

मतगणना भइरहेका पालिकाहरुमा पनि नेपाली काँग्रेस नै अगाडी देखिन्छ । काँग्रेस करिब १५० वटा पालिकामा अग्रपंक्तिमा छ भने एमाले करिब ९० वटामा । उता माओवादी केन्द्र करिब ४० वटामा अगाडी छ भने जनता समाजवादी पार्टी करिब ३० स्थानमा अगाडी छ । नेकपा एकीकृत समाजवादी १४ स्थान र लोकतान्त्रिक समाजवादी पार्टी ११ स्थानमा अगाडी रहेका छन् ।