घाइते सैनिकहरुको अन्तर्राष्ट्रिय खेलकुदमा बेलायतको प्रतिनिधित्व गर्दै गोरखा सैनिक

लण्डन । कर्तव्य गर्दागर्दै विभिन्न घटनामा परी घाइते भएका सैनिकहरुको अन्तर्राष्ट्रिय खेलकुद प्रतियोगिता इनभिक्टस खेल आजदेखि हल्याण्डमा शुरु भएको छ ।

पूर्व राजकुमार ह्यारी र उनकी श्रीमती मेघनले आज द हेगमा एक साता लामो सो खेलको शुरुवातको घोषणा गरे । सन् २०१४ देखि शुरु भएको यस खेल सन् २०२० र सन् २०२१ मा कोभिडका कारण स्थगित भएको थियो ।

२० देशका करिब ५०० खेलाडीले भाग लिने सो प्रतियोगितामा बेलायतको तर्फबाट भाग लिने ६५ सदस्सीय खेल टोलीमा एक पूर्व गोरखा सैनिक पनि परेका छन् ।

सरेमा बसोबास गर्ने पूर्व गोरखा सैनिक विक्रान्त गुरुङले सो खेलमा सिटिङ भलिवल र भारत्तोलन खेलमा प्रतिस्पर्धा गर्दैछन् ।

गुरुङ अफगानिस्तानमा खटिएको बेलामा घाइते भई दाहिने खुट्टा घुँडाभन्दा माथिदेखि काट्नु परेको थियो ।

४० वर्षीय गुरुङले ट्रयाकमा धेरै खेलमा भाग लिएका छन् ।

चोटपटकबाट निको भए पनि मानसिक रुपमा तङ्ग्रिनमा खेलकुदले महत्त्वपूर्ण सहयोग गरेको गुरुङ बताउँछन् । हेल्फ फर हिरोजसित उनले भनेका छन्, ‘आर्मी जीवनको अभाव महसुस भइरहेको थियो तर इनभिक्टस खेलमा संलग्न हुने बित्तिकै सिटिङ भलिबलमा बेलायतको प्रतिनिधित्व गर्ने मौका पाएँ । यसले मलाई आत्मविश्वास दियो । मैले कहिल्यै यसरी खेल्न सकुँला भनेर सोचेकै थिएन ।’

कोरोना महामारीका कारण गुरुङले दुई वर्ष कुनै अभ्यास गर्न पाएनन् । भर्चुअल बैठक र तालिम मात्र त्यतिबेला हुने गर्दथ्यो । त्यसले पनि मानसिक रुपमा केही सहयोग गरेको उनले बताए । 

‘कृतिम खुट्टा लगाएपछि मेरो देशको प्रतिनिधित्व गर्दै खेल्छु भन्ने लागेकै थिए । यसले मलाई धेरै साहस दिएको छ’ उनले भनेका छन् ।
खेलले बाहिर आउन मद्दत गरेको र आत्मविश्वास दिएको उनले बताएका छन् । यसले आफूलाई मात्र नभई परिवारमा पनि खुशी दिएको उनको भनाइ छ ।