बेलायती रक्षा मन्त्रीसित नक्कली युक्रेनी प्रधानमन्त्रीको १० मिनेट भिडियो कल

लण्डन । युक्रेन संकट गहिरिँदै जाँदा बेलायतका एक वरिष्ठ मन्त्रीसित एक व्यक्तिले युक्रेनका प्रधानमन्त्री बनी १० मिनेट भिडियो वार्ता गरेका छन् ।

युक्रेनी झण्डा पृष्ठभूमिमा राखी भिडियो वार्तामा बसेका ती व्यक्तिले बेलायतका रक्षा मन्त्री बेन वालेससँग बेलायतले युक्रेनलाई गर्नसक्ने सैनिक सहयोग लगायतका सुरक्षाका गम्भीर विषयहरुमा प्रश्न सोधेको बीबीसीले बताएको छ ।

युक्रेनका प्रधानमन्त्री डेनिस सामुयलले सो घटनाको भत्सर्ना गर्दै सो कार्यमा रसियाको हात रहेको आरोप लगाएका छन्  भने बेलायती रक्षा मन्त्री वालेसले आफूलाई नक्कली व्यक्तिले फोन गरेको ट्वीटमा बताएका छन् । बेलायती गृहमन्त्री प्रीति पटेलले आफूलाई पनि गत साता त्यस्तै किसिमको फोन आएको बताएकी छिन् तर उनलाई आएको फोनका बारेमा विस्तृत विवरण आएको छैन ।

बीबीसीका अनुसार लण्डनस्थित युक्रेनियन राजदुताबासका कर्मचारीले भिडियो कल सेट गरेर बेलायती सरकारी अधिकारी कहाँ पठाएका थिए । त्यसपछि त्यो लिंक रक्षा मन्त्रालयमा पठाइएको थियो ।

१० मिनेटसम्म चलेको सो वार्तामा नक्कली युक्रेनी प्रधानमन्त्रीले नेटो, बेलायती सैनिक परिचालन र अहिले युक्रेन र रसियाबीच भइरहेको वार्ताका बारेमा प्रश्न गरेको बताइएको छ । वालेसले वार्तामा महत्वपूर्ण जानकारी नदिएको बताए पनि उनले सो घटनाको छानविनका लागि निर्देशन दिएका छन् ।