बेलायतले युक्रेनमा सेना नपठाउने

लण्डन । बेलायतले रुसी सेनासित लड्न युक्रेनमा आफ्नो सैनिक नपठाउने भएको छ ।

बेलायती रक्षा मन्त्री बेन बालेसले बेलायतले युक्रेनमा सैनिक पठाएमा त्यसले युरोपमा युद्ध निम्त्याउने बताउँदै आफ्नो सेना त्यहाँ नपठाउने प्रष्ट पारेका छन् ।

युक्रेन नेटोको सदस्य नभएको तर बेलायत नेटोको सदस्य भएकाले बेलायतले युक्रेनमा सेना पठाउँदा त्यसले युद्धको रुप लिने उनको तर्क छ ।

बालेसले हालसम्म रसियाले युक्रेनमा ठूलो क्षति ब्यहोरेको दाबी गरे । उनले करिब ४५० रुसी सैनिक युक्रेनमा मारिएको बताए । उता बेलायतका अर्का मन्त्रीले युक्रेनतर्फ १९४ जना मारिएको र त्यसमध्ये ५७ जना गैरसैनिक मारिएको बताएका छन् ।

बेलायतले युक्रेनमा आफ्नो सेना पठाउनुको साटो हातहतियार र उपकरणहरु पठाउने पनि बालेसले जानकारी दिए । हालसम्ममा करिब २० हजार युक्रेनी सैनिकलाई तालिम दिइएको र हतियार पनि उपलब्ध गराइएको बताए ।

रसियाले बिहीबार युक्रेनमा आक्रमण गरेपछि करिब १ लाख मानिसहरुले युक्रेन छाडेको संयुक्त राष्ट्रसंघको भनाइ छ । रसियाको कदमको प्रतिक्रियास्वरुप बेलायतले रसियामाथि विभिन्न प्रतिबन्ध लगाएको छ जसमा रसियन हवाइ सेवालाई बेलायतमा उडान भर्न निषेध गरिएको छ भने बदलामा रसियाले पनि बेलायती विमानसेवालाई रसियामा उडान भर्न प्रतिबन्ध लगाएको छ । यस्तै बेलायतले रसियन राजदुतलाई फिर्ता पठाएको छ ।