कन्जरभेटिभका सांसद लेबर पार्टीमा प्रवेश

लण्डन । बेलायतको सत्तारुढ कन्जरभेटिभ पार्टीका एक सांसद प्रधानमन्त्री तथा साे पार्टीका नेता बोरिस जोन्सनसित असहमति जनाउँदै प्रतिपक्षी लेबर पार्टीमा प्रवेश गरेका छन् ।

बेरी साउथ निर्वाचन क्षेत्रका सांसद क्रिस्चियन वेकफोर्डले प्रधानमन्त्री जोन्सन र उनको नेतृत्वको कन्जरभेटिभ पार्टी बेलायतलाई नेतृत्व दिन र सरकार संचालन गर्न असक्षम भएको कारण देखाउँदै लेबर पार्टीमा प्रवेश गरेका हुन् ।

उनलाई विपक्षी दलका नेता सर किअर स्ट्यामरले स्वागत गरेका थिए ।

प्रधानमन्त्री जोन्सनले भने बेरी साउथ निर्वाचन क्षेत्रमा आफ्नो नेतृत्वमा कन्जरभेटिभ पार्टीले वर्षौ‌ंदेखिको लेबर पार्टीको कब्जाबाट जित हात पारेको उल्लेख गर्दै आगामी चुनावमा फेरि जित्ने दाबी गरे ।

३७ वर्षीय पूर्व बीमा एजेन्ट तथा काउन्सिलर वेकफोर्डले सन् २०१९ मा सो निर्वाचन क्षेत्रमा लेबर पार्टीका उम्मेदवारलाई झीनो मतले पराजित गरेका थिए ।