बेलायती संसदमा चिनियाँ जासुसी एजेन्ट !

लन्डन । बेलायती संसदका सदस्यहरुलाई अनुचित प्रभाव देखाउन चिनियाँ कम्युनिस्ट पार्टीले एक जना महिला घुसपैठ गरेको बेलायतको गुप्तचर संस्था एमआईफाइवले जनाएको छ ।

चिनियाँ कम्युनिस्ट पार्टीको पक्षमा प्रभाव पार्न र बेलायतको ‘राजनीतिक गतिविधिलाई हस्तक्षेप गर्न क्रिष्टिन ली नाम गरेकी महिलालाई घुसपैठ गरेको भन्दै एमआईफाइवले उनको तस्वीर सार्वजनिक गरेको छ । साथै उनी सांसदहरुको सम्पर्कमा आएमा सुरक्षा निकायलाई सम्पर्क गर्न भनिएको छ ।

हङकङ र चीनमा भएका विदेशी नागरिकहरुको तर्फबाट लीले बहालवाला सांसदहरुलाई वित्तीय सहयोग प्रदान गरेको एमआइफाइवले जनाएको छ ।

पेशाले कानुन व्यवसायी ली बेलायती नागरिक हुन् । उनको नाममा बेलायतमा विभिन्न व्यवसाय दर्ता छ । उनले चीन सम्बन्धी सर्वदलीय संसदीय समितिका संयोजक तथा लेबोर पार्टीका सांसद ब्यारी गार्डिनरलाई पटकपटक गरी ४ लाख पाउण्डभन्दा बढी सहयोग गरेको पाइएको छ । साथै लीका छोरा सांसद गार्डिनरको कार्यालयमा कार्यरत रहेको पनि बताइएको छ ।

गार्डिनरले लीका छोराले विहीबार नै राजिनामा दिएको र आफूले पाएको सहयोग वैधानिक रहेको दाबी गरेका छन् ।

लीले यसबाहेक सबै दलका सांसदहरुलाई सहयोग गर्ने गरेको पाइएको छ ।

लन्डनस्थित चिनियाँ दूतावासले भने ती आरोप अस्वीकार गरेको छ । ‘विदेशीको संसदमा हस्तक्षेप गर्नु हामीलाई कुनै आवश्यकता छैन । हामीले यस्तो प्रयत्न गरेका पनि छैनौं,’ दूतावासले भनेको छ ।