एनआरएनए यूकेको मिडिया संयोजकमा शिव भण्डारी

लण्डन । गैर आवासीय नेपाली संघ (एनआरएनए) यूकेको मिडिया संयोजकमा शिव भण्डारी चयन भएका छन् ।

एनआरएनए युकेको कार्यसमितिले लण्डन नेपाल न्यूजका प्रधान सम्पादक समेत रहेका भण्डारीलाई संयोजक पदमा मनोनयन गरेको हो ।

नेपाल पत्रकार महासंघ यूके शाखाका उपाध्यक्षसमेत रहेका भण्डारीसित नेपाल पत्रकार महासंघ यूकेको दुई कार्यकाल सचिवमा निर्वाचित भइ काम गरेको अनुभव छ । यस्तै उनी गुल्मी जिल्ला समाज युकेका पूर्व महासचिव पनि हुन् ।

लगनशीलता र मेहेनतका साथ बेलायतस्थित नेपाली समुदायमा सक्रिय पत्रकारको भूमिका निर्वाह गरेका कारण महत्वपूर्ण जिम्मेवारी प्राप्त भएको आफूले महसुस गरेको उनले बताए । भण्डारी बेलायतमा १२ वर्षदेखि पत्रकारितामा छन् ।

गुल्मी धुर्कोट स्थायी घर भएका भण्डारीले करिब एक दशकअघि लण्डन नेपाल न्यूज नामक आफ्नै अनलाइन समाचार पोर्टल शुरू गरेका थिए ।

भण्डारीको नेतृत्वमा सञ्चालित लण्डन नेपाल न्यूज हाल बेलायतमा एक प्रमुख अनलाइन पत्रिका मानिन्छ ।

मिडिया संयोजकको रुपमा जिम्मेवारी दिइएको प्रति उनले एनआरएनए यूके अध्यक्ष प्रेम गाहा मगरसहितको कार्यसमितिलाई आभार व्यक्त गर्दै आफूले पाएको जिम्मेवारी पूर्ण रुपमा दत्तचित्त भएर पूरा गर्ने प्रतिबद्धता जनाएका छन् ।