बेलायतद्वारा नेपाललाई १ लाख ३० हजार डोज कोरोना खोप सहयोग

लण्डन । बेलायतले नेपाललाई १ लाख ३० हजार डोज कोरोना विरुद्धको खोप प्रदान गरेको छ ।

काठमाडौँमा सो खोप नेपालका लागि बेलायतकी राजदुत निकोला पोलिटले स्वास्थ्य मन्त्रालयका प्रमुख विशेषज्ञ दीपेन्द्ररमण सिंहलाई हस्तान्तरण गरेको नेपालको परराष्ट्र मन्त्रालयले जनाएको छ ।

अक्सफोर्ड आष्ट्रजेनिकाको सो खोप कोभ्याक्समा बेलायतले गरेकाे प्रतिवद्धताअनुसार नेपाल पठाइएको हो ।

नेपालका लागि बेलायती राजदुत पोलिटले सो अवसरमा नेपाल र बेलायतबीचको दुई शताब्दी लामो सहयोगको उल्लेख गर्न छुटाइनन् तर नेपाली समुदायमा भने बेलायत नेपालको पुरानो मित्र भए पनि नेपाललाई कोरोना विरुद्धको खोप सहयोग गर्नमा बेलायत उदासिन रहेको भनाइ छ ।

केही साताअघि बेलायतमा रहेका नेपाली समुदायका अगुवा तथा नेपाललाई माया गर्ने बेलायतीहरुले बेलायतका विदेश मन्त्री तथा आफ्ना क्षेत्रका सा‌ंसदहरुलाई पत्राचार समेत गरेका थिए । सर्वसाधारणले हस्ताक्षर संकलन गरी स‌ंसदमा बहस समेत भएको थियो तर पनि बेलायतले कुनै सहयोगको वचन दिन सकेन ।

खोप उत्पादक राष्ट्रसमेत रहेको बेलायतले दुईसय वर्षभन्दा लामो कुटनीतिक सम्बन्ध रहेको मित्र राष्ट्रप्रति गरेको यस किसिमको वेवास्ताको आलोचना भएको छ ।