बेलायतकी महारानीद्वारा इङल्याण्ड टीमलाई युरो कप फाइनलका लागि शुभकामना

लण्डन । बेलायतकी महारानी एलिजावेथ द्वितीयाले युरोपियन कपको फाइनलमा पुग्न सफल इङ्ल्याण्डको राष्ट्रिय फुटबल टोलीलाई शुभकामना दिनुभएको छ ।

महारानीले शनिबार एक ट्वीट गर्दै इङल्याण्ड फुटबल टीमका म्यानेजर ग्यारेथ साउथगेटमार्फत टीम इङल्याण्डलाई आइतबार हुने फाइनल खेलका लागि शुभकामना दिनुभएको हो ।

ट्वीटमा महारानीले ५५ वर्षअघि बबी मुरलाई विश्वकप हस्तान्तरण गर्ने सौभाग्य पाएको र अन्तर्राष्ट्रिय फुटबल टुनामेण्टको फाइनल खेल जित्नुको महत्व खेलाडी, व्यवस्थापन टीम र सहयोगी टीमका लागि कति हुन्छ भन्ने थाहा पाएको बताउनुभएको छ ।

युरोपियन च्याम्पियनसीपको फाइनलमा पुगेकोमा बधाई दिँदै महारानीले भोलिको खेलका लागि शुभकामना दिनुभएकाे छ । उहाँले भन्नुभएको छ- इतिहासले तपाईहरुको सफलता मात्र होइन भावना, प्रतिवद्धता र गौरव पनि कायम गर्नेछ ।