इन्जिनियरिङमा अन्तर्राष्ट्रिय अवार्ड जित्ने गोरखा सैनिककी छोरी

लण्डन । गोरखा सैनिककी छोरी सेलिना राईले यस वर्षको प्रतिष्ठित आइसिई इन्टरन्याशनल इन्जिनियरिङ अवार्ड हात पारिन् ।

हाल लिड्समा बसोबास गर्ने राई योर्कसायर र हम्बर क्षेत्रबाट सो प्रतिस्पर्धामा प्रवेश गरेकी थिइन् । आफ्नो क्षेत्रका प्रतिस्पर्धीलाई पछि पार्दै उनले  त्यस क्षेत्रको फाइनलमा जितेकी थिइन् । यसरी विश्वको विभिन्न क्षेत्रबाट छानिएका फाइनलिष्टहरुमध्येबाट उनीहरुको प्रस्तुति पढेर आईसिईको अन्तर्राष्टिय समितिले स्तरको फाइनलमा छनौट गर्ने गर्छ । यसरी विश्वभरबाट आएका प्रतिस्पर्धीहरुमध्येबाट फाइनलमा छानिएकी उनको फाइनलमा प्रतिस्पर्धा युकेका दुई र हङकङका एक युवा इन्जिनियरहरुसित भयो । उनको भुकम्प आउने क्षेत्रमा कंक्रिटको पर्खाललाई कसरी सुरक्षित राख्ने भन्ने बारेको अनुसन्धानले उनलाई यस वर्षको आइसिई इन्टरन्याशनल इन्जिनियरिङ अवार्ड दिलायाे ।

आईसिई (इन्स्टिच्यूट अफ सिभिल इन्जिनियर्स) नामक अन्तर्राष्टिय संस्थाले आयोजना गर्ने यस प्रतिस्पर्धामा इन्जिनियरिङका विश्वभरका विद्यार्थीहरु, इन्जिनियरिङमा विश्वविद्यालयका अध्ययन पूरा गरेकाहरु, प्रशिक्षार्थी प्राविधिकहरुले भाग लिने गर्दछन् । सिभिल इन्जिनियरिङका नयाँ सोचहरु, नयाँ अनुसन्धानहरु, परियोजनाका उत्कृष्ट नमूना अभ्यासहरु लिएर प्रतिस्पर्धीहरु यस अवार्डमा भाग लिन्छन् । राईले प्रतिष्ठित अवार्डसँगसँगै १ हजार ५०० पाउण्ड नगद पनि हात पारेकी छिन् ।

हाल ब्रुनाइमा रहेका टुआरजिआरका गोरखा सैनिकका जेठी छोरी राईले विद्यालय तथा कलेज अध्ययन बेलायतमै गरिन् । युनिभर्सिटी अफ सेफिल्डबाट इन्जिनियरिङमा मास्टर्स गरेपछि हाल उनी ‘अरप’ भन्ने संस्थाको लिड्समा रहेको शाखामा स्ट्रक्चरल इन्जिनियरका रुपमा काम गर्छिन् ।

उनको सन् २०२० को संकल्प थियो – बोल्ने कलालाई सुधार्ने। उनको यो योजनाका बारेमा उनका सहकर्मीहरुलाई पनि थाहा थियो । यस्तैमा एक दिन उनको एक सहकर्मीले उनलाई आईसिई इन्जिनियरिङ अवार्डका बारेमा सुनाए । सो प्रतिस्पर्धाले बोल्ने कला राम्रो बनाउन सघाउन सक्ने पनि बताए । राईलाई पनि लाग्यो किन कोसिस नगर्ने ?

अवार्ड पाएपछि उनले आफ्नो बोल्ने कलामा सुधार आएको महसुस गरेकी छिन् । साथसाथै अवार्डले आफ्नो पेशामा पनि सहयोग गर्नसक्ने उनको आशा छ । आफू कार्यरत संस्थामा पनि आफ्नो नाम अलि धेरैले चिन्ने भएको र सम्भावनाका अवसरहरु पनि आउन थालेको उनले बताइन् । ‘जर्नल आर्टिकल लेख्नका लागि प्रस्वाव आएको छ’ उनले भनिन् ।

बेलायतमा केही वर्षदेखि बस्दै आए पनि बेलायतको विभिन्न क्षेत्रको मूल प्रवाहमा नेपालीहरुको उपस्थिति उनले कम देखेकी छिन् । नेपालबाट आएकाले मानसिक रुपमा स्थानीयहरुसित प्रतिस्पर्धा गर्न नसकिएला कि भन्ने सोचाइलाई आफ्नो अवार्डले चिर्न सहयोग गर्ने उनको विश्वास छ । ”म मेरो भाइबहिनीहरुलाई सबै क्षेत्रमा प्रोत्साहन गर्न चाहन्छु । बेलायतको विभिन्न क्षेत्रमा नयाँ नेपाली पुस्ताको प्रतिनिधित्व बढोस् भन्ने सन्देश दिन चाहन्छु ।”