बेलायतमा बेरोजगारी तीन वर्षकै सबैभन्दा उच्च

लण्डन । कोरोना भाइरसको महामारीका कारण बेलायतमा बेरोजगारीको संख्या विगत तीन वर्षकै सबैभन्दा उच्च विन्दुमा पुगेको छ ।

बेलायतको राष्ट्रिय तथ्या‌ंक कार्यालय (ओएनएस) का अनुसार जुन-जुलाई-अगष्ट सम्ममा बेरोजगारीको दर ४ दशमलव ५ प्रतिशतले बढेको छ । जबकि सोभन्दा अघिल्ला तीन महिनामा सो दर ४ दशमलव १ प्रतिशत रहेको थियो ।

कार्यालयले जागिर कटौती सन् २००९ यताकै उच्च विन्दुमा पुगेको बताएको छ ।

सरकारले कोरोना भाइरस नियन्त्रणका लागि तीन तहको सतर्कता अपनाई कडाइ गर्ने घोषणा गरेकै भोलिपल्ट यो तथ्या‌ङ्क आएको हो ।

कार्यालयका डेपुटी तथ्यांकशास्त्री जोनाथन आथोले मार्चयता मानिसहरुले जागिर गुमाउने र जागिर खोज्ने क्रम अति नै बढेको बताए ।

महामारी शुरु भएयता करिब ५ लाख मानिसले बेलायतमा जागिर गुमाएको अनुमान गरिएको छ । जसमा युवावर्ग सबैभन्दा प्रभावित रहेको उनले बताए । १६ देखि २४ वर्ष उमेर समूहका ३ लाख मानिसहरु रोजगारविहीन भएको र यो संख्या कूल बेरोजगार संख्याको ६० प्रतिशत रहेको बताइएको छ।