आजदेखि बेलायतमा के के नियम परिवर्तन हुँदैछन् ?

लण्डन । कोरोना भाइरसको संक्रमण घटाउन बेलायतका तीन राज्य इङल्याण्ड, स्कटल्याण्ड र वेल्समा छ जनाभन्दा जम्मा हुन नपाउने नियम लागू हुँदैछ ।

सरकारले जमघटका लागि लागू गरिएको नयाँ नियमले नियम उल्लंघन गर्नेहरुलाई चिन्न र हटाउन प्रहरीलाई सजिलो बनाउने विश्वास लिएको छ ।

तर राज्यपिच्छे के के गरेमा नियम उल्लंघन हुन्छ,  नियम तोडे के हुन्छ भन्ने फरक फरक व्यवस्था छ ।

नयाँ नियम घरभित्र र बाहिर दुवै भेटघाटमा लागू हुनेछ ।

यो नियम इङल्याण्डमा सबै उमेर समूहलाई लागू हुनेछ भने वेल्समा ११ वर्ष मुनीका बाहेक सबैलाई र स्कटल्याण्डमा १२ वर्ष माथिका सबैमा लागू हुनेछ । नर्देन आयरल्याण्डमा भने दुई अलगअलग घरका ६ जना घरभित्र र घर बाहिर १५ जनासम्म भेटघाट गर्न पाउने छन् ।

पब, रेष्टुरेन्टहरुले अब ग्राहकको टेष्ट तथा ट्रयास सूचना कानुनत लिन पर्नेछ र २१ दिनसम्म राख्न पर्नेछ ।

को कोलाई यो नियम लाग्दैन ? 

एउटै घरका वा रेखरेख गरिरहेका परिवारका ६ जनाभन्दा बढी भए पनि अझै भेटघाट गर्न पाउनेछन् ।

कार्यस्थल अथवा शैक्षिक क्षेत्रमा ६ जनाभन्दा बढी अझै भेट्न पाउँछन् ।

पूजा आराधना गर्ने स्थानहरु, जिमहरु, अतिथि सत्कारका क्षेत्रहरुमा अझै ६ जनाभन्दा बढी जम्मा हुन पाउने छन् ।

विवाह, अन्तिम सँस्कारमा इङल्याण्ड र वेल्समा ३०, स्कटल्याण्डमा २० जना सरिक हुन पाउनेछन् ।

समूहमा खेलिने खेलहरुमा कोरोनाबाट सुरक्षित वातावरण बनाइ ६ जनाभन्दा धेरै भेट्न पाउने छन् ।

नियम तोडे के हुन्छ ?

सरकारले बनाएको नयाँ नियम उल्लंघन गरेमा १०० पाउण्ड जरिवाना हुनेछ र पटकपटक नियम तोडेमा दोब्बर जरिवाना हुनेछ र ३ हजार २०० पाउण्डसम्म जरिवाना हुन सक्नेछ ।

प्रधानमन्त्री बोरिस जोन्सनका अनुसार ‘कोभिड सेक्युर मार्शल’ हरुले बजारमा नयाँ नियमको पालना गराउने छन् । सीमा बलले बेलायत भित्रिनेहरुलाई क्वारेन्टीनमा बसेको अनुगमन गर्नेछन् ।

नयाँ नियम किन ? 

दैनिक कोरोना संक्रमणको दर बढेपछि त्यसलाई नियन्त्रण गर्न नयाँ नियम ल्याउनु परेको हो ।