नर्सहरुको वार्षिक रजिस्ट्रशन फीमा छुट दिन माग

लण्डन । बेलायत सरकारसमक्ष सांसदहरुले फ्रन्टलाईनमा कार्यरत नर्सहरुको वार्षिक रजिस्ट्रशन फीमा छुट दिन माग गरेका छन् ।

स्वास्थ्यमन्त्री (हेल्थ सेक्रेटरी) म्याट ह्यनककलाई पत्राचार गरी नर्सहरुको वार्षिक रजिस्ट्रशन फीमा छुट दिन आग्रह गरेका हुन् । लेवर पार्टीका इलिङ्ग र साउथलबाट प्रतिनिधित्व गर्ने सांसद बीरेन्द्र शर्माको नेतृत्वमा ३८ जना सांसदहरुले कोरोना संक्रमणसँग फ्रन्टलाइनमा खट्ने स्वास्थ्यकर्मीका पक्षमा आवाज उठाएका हुन् ।

सांसद शर्माद्वारा हस्ताक्षरित उक्त पत्रमा कोरोना महामारीमा अग्रपंक्तिमा काम गर्ने नर्सहरुले नर्सिंङ एण्ड मिड्वाइफ़री काउन्सिल (एनएमसी) रजिस्ट्रेशन को १२० पाउण्ड फी मिनाहा गर्नुपर्ने उल्लेख छ । नेशनल हेल्थ सर्भिस (एनएचएस) अनुसार बेलायतमा करीब ५० लाख नर्स रहेका छन् ।