लिम्बुवानका दुई राजनैतिक पार्टीहरूबीच बेलायतमा एकता

लण्डन । बेलायतमा रहेका लिम्बुवानका दुई राजनीतिक पार्टीका संस्थाहरुबीच एकता भएको छ ।
लिम्बुवान नागरिक समाज युकेको विशेष पहलमा लण्डनमा भएको बृहत बैठकले संघीय लिम्बुवान राज्य सम्पर्क समिति युके र लिम्बुवान मुक्ति मोर्चा नेपाल प्रवास सम्पर्क समिति युकेबीच एकताको घोषणा गरेको हो ।
एकीकरणपछि नयाँ संस्थाको नाम संघीय लिम्बुवान पार्टी नेपाल, प्रवास समिति युके राखिएको छ ।
नयाँ संस्थाको अध्यक्षमा डम्बर लिवाङ चुनिएका छन् । त्यसैगरी उपाध्यक्षद्वयमा तिल सम्बाहाम्फे र हेम वनेम, महासचिवमा महेश वनेम, सचिवमा कुमारी काम्वाङ लिङदेन, कोषाध्यक्षमा कृष्ण फोम्बो र सहकोषाध्यक्षमा कर्ण पराङदेन रहेका छन् । समितिमा २८ सदस्य चुनिएका छन् ।
नागरिक समाजले बेलायतमा रहेको अर्को लिम्बुवानको राजनैतिक पार्टीको संस्था मञ्च सम्वद्ध संघीय लिम्बुवान राज्य परिषद् प्रवास समिति युकेलाई पनि एकतामा सहभागी हुन अनुरोध गरेको थियो । तर सो समितिले नागरिक समाजलाई पत्र लेखी एकतामा सामेल नहुने जानकारी गराएको थियो ।
एकताले बेलायतका लिम्बुहरुबीच उत्साह फैलाएको छ ।
यसअघि नेपालमा विभाजन भए पनि बेलायतमा एउटै मात्र लिम्बुवानको राजनैतिक संस्था गठन गर्ने प्रयास भएको थियो । त्यसमा सफलता हात नलागेपछि एकताको प्रयास गरिएको थियो तर सो प्रयास पनि मञ्च सम्वद्ध लिम्बुवान राज्य परिषद्कै कारण ढिलाइ भएको बताइएको छ ।