अल्डरसटमा एक नेपाली महिला दिउँसै लुटिइन्

अल्डरसट । नेपालीहरुको बाक्लो बस्ती मानिएको बेलायतस्थित अल्डरसटमा एक महिला दिउँसै लुटिएकी छिन् ।
अल्डरसटको द प्यालेस नजिक करिव एक बजेर १५ मिनेट जाँदा ७० बर्षीया महिलाको बुधवार ६ तोला सुनको ‘नेक्लेस’ चोरी भएको हो । एसिएन जस्ता देखिने दुई लुटेराले ति महिलालाई दिनदहाडै लछारपछार गरी सुन चोरेर भागेका थिए ।

द प्यालेसका टंक रानाका अनुसार लुटेराहरु भल्भो रजिस्ट्रेसन RO12 JZF नम्बरको कारमा चढेर आएका थिए । सो क्रममा महिलाको नाडीमा सामान्य कोतारिए पनि उनको स्वास्थ्य अवस्था भने सामान्य छ । घटना भएको केही बेरमै प्रहरी आएर ‘फोरेन्सिक चेक’ का लागि महिलाको कपडा लिएको बताइएको छ ।

दशै तिहार नजिकिंदा नेपालीका गरगहना लुटिने क्रम बढेको छ । सुन चोरी भएपछि ति महिला निकै त्रसित भएकी छिन् । पीडित महिलाका पतिले चोरीमा प्रयोग गरिएको कार कसैले देखेमा प्रहरीमा खवर गर्न आग्रह गरेका छन् ।

तस्बिर – नेपालीपत्र