लर्डस क्रिकेट हेर्न अब अनलाइन खरिदको झन्झट हट्यो

लन्डन । अनलाइन खरिदको झन्झट हटाउंदै लर्डसले प्रिन्टेड टिकेट नै उपलव्ध गराएपछि दर्शकलाई ऐतिहासिक खेल हेर्न सहज हुने भएको छ ।

आगामी जुलाई १९ तारिख नेपाली राष्ट्रिय क्रिकेट टोली र बेलायतको प्रतिष्ठित एमसीसी क्लबबीच विश्वविख्यात लर्डस क्रिकेट मैदानमा हुने मैत्रीपूर्ण खेलको टिकेट अनलाइनबाट मात्र लिनुपर्ने झन्झट हटेको हो ।

लर्डसले पहिलो चरणमा ५२५ टिकेट उपलब्ध गराएको छ । मूल आयोजक समिति र लन्डनस्थित नेपाली दूतावासको विशेष पहलमा प्रिन्टेट टिकेट उपलव्ध भएको टिकेटिंग संयोजक राजन खकुरेलले बताए ।

खेलमा सहभागिता बढाउने उद्देश्यसहित दूतावासको संयोजनमा गठित आयोजक समिति अन्तर्गत पिआर व्यवस्थापन समितिका संयोजक पत्रकार एभरेष्ट गौतमले ५२५ टिकेट आफूहरुले बुझिसकेको र उपलव्ध टिकेट बिक्री भइसकेपछि थप टिकेट झिकाइने बताए ।

आजसम्म उक्त खेलका लागि करिब १९०० टिकेट बिक्री भइसकेको छ । टिकेट किन्न चाहने दर्शकले आयोजक समितिका अभियन्ताहरुलाई सम्पर्क गरेर टिकेट लिन सक्नेछन् । सिधै प्रिन्टेड टिकेट लिंदा पनि अनलाइनमै लिएजस्तै १० पाउण्ड मात्रै लाग्ने टिकेटिंग संयोजक राजन खकुरेलले बताए ।

एनआरएनए यूके कोषाध्यक्ष तथा आर्थिक समितिको नेतृत्व गरिरहेका दीपक श्रेष्ठले सम्पूर्ण बेलायतबासी नेपालीहरुलाई एकजुट भएर खेलमा उपस्थित हुन आव्हान गरेका छन् । उक्त मैत्रीपूर्ण खेलमा १० हजार दर्शक उतार्ने चुनौतीबीच यतिखेर बेलायतको नेपाली समुदाय एकसाथ लागिरहेको छ ।

यसैबीच आयोजक समितिले सो खेललाई लक्षित गर्दै नेपालबाट नेपाली क्रिकेट टोलीको जर्सी लन्डन ल्याइसकेको छ । एक जर्सीका लागि १० पाउन्ड पर्ने र जर्सी तथा टिकेट किन्न चाहनेहरुले आयोजक समितिका निम्न व्यक्तिलाई सम्पर्क गर्न सक्नेछन् ।

दीपक श्रेष्ठ-  07943866690

राजन खकुरेल-  07938623803

एभरेस्ट गौतम- 07838504092

कृष्णप्रसाद शर्मा- 07415360712