गुल्मी जिल्ला समाजद्वारा आर्थिक सहयोग प्रदान

लन्डन । गुल्मी जिल्ला समाज यूकेले नेपालमा दुई परिवारलाई आर्थिक सहयोग गरेको छ । समाजले चम्ल्याहा सन्तानका बाबु जनक कुँवर र भारतमा श्रीमानको निधन भएपछि सहाराविहीन भएकी सीता भूसाललाई जनही ५०, ५० हजार रुपैयां सहयोग गरेको हो ।

काठमाडौं डिल्लीबजारस्थित टाइम्स कलेजमा एक कार्यक्रमबीच समाजका महासचिव शिव भण्डारीले रकम हस्तान्तरण गरेका हुन् । जैसिथोक समाज, काठमाडौंको आयोजनामा भएको रकम हस्तान्तरण कार्यक्रममा बोल्दै समाजका महासचिव भण्डारीले मानवीय सहयोग र जिल्लाको विकासमा समाजले निरन्तर सहयोग  दिइरहने बताए ।

जैसिथोक समाज, काठमाडौंका अध्यक्ष राजनप्रसाद पोखरेलले पीडित परिवारलाई सहयोग गरेकोमा समाजलाई धन्यवाद दिए । उनले आगामी दिनमा पनि आफ्नो जन्मस्थलले कुन न कुनै रुपले सहयोग पाइरहने विश्वास व्यक्त गरे ।

सचिव कृष्ण भण्डारीले सञ्चालन गरेको उक्त कार्यक्रममा इन्द्र पोखरेलले स्वागत मन्तव्य व्यक्त गरेका थिए भने पूर्व गाविस अध्यक्ष सुरेन्द्र पोखरेलले आफ्नो धारणा राखेका थिए । कार्यक्रममा उपप्राध्यापक विष्णु पन्थीलगायतको उपस्थिति थियो ।