बीएनसीसी नेतृत्व पुनः कंडेलमाथि

लन्डन । ब्रिटेन नेपाल चेम्वर अफ कमर्स (बीएनसीसी) को साधारण सभाले सर्वसम्मत नयां नेतृत्व चयन गरेको छ । विहिबार सम्पन्न साधारण सभाले राजन कंडेलको नेतृत्वमा सात सदस्यीय कार्यसमिति निर्वाचित गरेको हो । कंडेल बीएनसीसीमा दोस्रो कार्यकालका लागि अध्यक्ष निर्वाचित भएका हुन् ।

उपाध्यक्षद्वयमा प्रशान्त कुंवर र आलन मर्सल सन्का, कोषाध्यक्षमा इन्द्र गिरी र कार्यसमिति सदस्यहरुमा विराज भट्ट, एस वर्मा र नदिया विलिएम्स निर्वाचित भएका छन् । नव निर्वाचित कार्यसमितिको कार्यकाल दुई वर्ष हुनेछ । बीएनसीसीको प्रमुख कार्यकारीमा रिचर्ड पेली पुनः नियुक्त भएका छन् ।

बेलायतका लागि नेपालका कार्यवहाक राजदूत तेजबहादुर क्षेत्रीको प्रमुख आतित्थ्यमा साधारण सभा भएको थियो । बीएनसीसी, बेलायतबाट नेपालमा लगानी तथा व्यापार प्रवद्र्धन गर्ने सबैभन्दा पुरानो संस्था मानिन्छ । यसको संरक्षक बेलायतस्थित नेपाली दूतावास हुने व्यवस्था छ ।

साधारण सभामा कंडेलले अध्यक्षको प्रतिवेदन मार्फत बीएनसीसीले यसअघि गरेका कामबारे संस्थाका सदस्यहरुलाई जानकारी गराएका थिए भने कोषाध्यक्ष इन्द्र गिरीले संस्थाको आर्थिक प्रतिवेदन प्रस्तुत गरेका थिए । साधारण सभाले दुवै प्रतिवेदन सर्वसम्मत पारित गरेको थियो ।

निर्वाचित कार्यसमितिले नेपालमा बेलायतको प्रत्यक्ष वैदेशिक लगानी भित्र्याउन बेलायतका लगानीकर्ताहरुलाई उत्प्रेरणा मिल्ने खालका गतिविधि सञ्चालन गर्ने नवनिर्वाचित अध्यक्ष कंडेलले बताए । ‘बीएनसीसीले आगामी कार्यकालका लागि चारवटा विशेष प्राथमिकताका क्षेत्र पहिचान गरेको छ । बीएनसीसीको सदस्यता विस्तारदेखि संस्थालाई आर्थिक रुपमा सवल बनाउने र नेपालमा लगानी प्रवद्र्धन गर्नेसम्मका योजना त्यसमा समेटिएका छन्’, कंडेलले भने ।

नेपाल र बेलायतमा व्यापार व्यवसाय सञ्चालन गर्ने उत्कृष्ट कम्पनीहरुलाई विशेष अवार्डबाट सम्मान गर्ने कार्यक्रम बीएनसीसीले बनाएको उनले जानकारी दिए ।

बीएसीसीले यसअघि बेलायतका लगानीकर्ताहरुलाई नेपाल लगेर नेपालमा लगानीको सम्भावनाबारे जानकारी गराएको थियो । त्यसबाहेक, नेपाली व्यवसायीका प्रतिनिधिमुलक संस्थाहरु र सम्बन्धित सरकारी निकायहरुबीच नेपाल र बेलायतको व्यापार अभिवृद्धिका लागि संयुक्त रुपमा गर्न सकिने प्रयासका बारेमा पनि विभिन्न छलफल र अन्तरक्रियात्मक कार्यक्रम बीएनसीसीले आयोजना गरेको थियो ।