एमसीसी विरुद्ध नेपाल क्रिकेट खेलबारे दूतावासमा अर्को बैठक

 

लन्डन । एमसीसी (मार्लेबोन क्रिकेट क्लव) र नेपाली क्रिकेट टिमबीचको मैत्रीपूर्ण खेल सफल बनाउन साता नबित्दै अर्को बैठक बस्ने भएको छ । ८ जुन बुधबार अपरान्ह ४ बजे लन्डनस्थित नेपाली दूतावासमा बैठक डाकिएको हो ।

बैठकमा बेलायतस्थित नेपाली संघसंस्थाका प्रतिनिधि र आयोजक समितिका सदस्यहरु सहभागी हुने अपेक्षा छ ।

नेपाली दूतावासको प्रत्यक्ष संलग्नतामा खेल सफल बनाउन तयारी समिति जुटिरहेको छ । यसमा गैर आवासीय नेपाली संघ बेलायत, नेपाल पर्यटन बोर्ड यूके लगायत संघसंस्थाको साथ छ ।

बेलायत नेपाल कुटनीतिक सम्बन्ध स्थापनाको दुई सय वर्ष पुगेको उपलक्ष्यमा आगामी जुलाई १९ तारिख मंगलबारका दिन पहिलोपटक विश्वविख्यात लर्डस् ग्राउण्डमा नेपाली टिमले खेल्न लागेको हो । यस्तो ऐतिहासिक खेलमा सहभागिता जनाउन दूतावासले आग्रह गरेको छ । प्रवेश शुल्क जम्मा दश पाउण्ड र शुल्कबाट संकलित रकमको केही हिस्सा नेपालको पुनर्निर्माणमा जाने भएकाले सबै बेलायतवासी नेपालीलाई सहभागी भइदिन आयोजकको अपिल छ ।

६५ वर्ष माथिकालाई ५ पाउण्ड र १६ वर्ष मुनीकालाई निशुल्क हुने उक्त खेलको टिकेट अनलाइन वा खेल हुने दिन ढोकैमा किन्न सकिनेछ । यतिखेर टिकेट विक्री र ब्यानर, लिफलेटसहित प्रचार प्रसारमा दीपक श्रेष्ठ, गणेश खड्का, एभरेष्ट गौतम, कृष्णप्रसाद शर्मा, राजन खकुरेल लगायतको दौडधुप छ ।