यतीमा हुने भयो भिडन्त

लन्डन । यती नेपाली एसोसिएसन यूकेको महाधिवेशन नजिकिंदै गर्दा निर्वाचन माहोल पनि तातेको छ । युरोपकै सबैभन्दा पुरानो नेपाली संस्थाको नेतृत्व सम्हाल्न समाजका केही अगुवाहरुले आकांक्षा देखाएका छन् । एसोसिएसनको अध्यक्षमा महिला समाजसेवी पिपला देवान, समाजसेवी ध्रुव केसी, खगेन्द्र नेपाली, विजय थापा र गोपाल पौड्याल लगायतको नाम आएको छ । सामाजिक क्रियाशिलता र महिला भएका हिसावले पिपला देवानलाई नेतृत्व दिनुपर्नेमा केही सामाजिक अगुवाले लविइंग थालिसकेका छन् । वरिष्ठ उपाध्यक्षमा वी पी खनाल, उपाध्यक्षमा बासु लामिछाने र कैलाश नेपाल, महासचिवमा बाचस्पति रेग्मीले आकांक्षा देखाएका छन् ।

यसैबीच, महाधिवेशनबाट नयां नेतृत्व चयनका लागि निर्वाचन तालिका प्रकाशित भएको छ । यही मे २८ मा हुने महाधिवेशनमा इच्छुक सदस्यलाई सक्रिय सहभागिता जनाउन एसोसिएसनका अध्यक्ष उमेशराज मोक्तान, प्रमुख निर्वाचन संयोजक राजकुमार त्रिपाठी र संयोजक शिव भण्डारीले एक विज्ञप्तिमार्फत आग्रह गरेका छन् ।

विज्ञप्तिमा सदस्यता फाराम कार्यसमिति वा निर्वाचन समितिबाट प्राप्त हुने जनाउंदै सदस्यता फाराम भरेर मे २८ दश बजेसम्म बुझाउन अपिल गरिएको छ । निर्वाचन समितिले सदस्यताको अन्तिम नामावली मे २८ दिउसो १२ बजे प्रकाशन गरिने, उम्मेदवारी दिउसो १ बजेसम्म, उम्मेदवारीमाथि दाबी विरोध साढे १ बजेसम्म र उम्मेदवारको अन्तिम नामावली १.४५ बजे प्रकाशन गरिने जनाएको छ ।

कार्यसमिति चयनका लागि दिउसो २ देखि ५ बजेसम्म निर्वाचन र ५ बजेपछि मतगणना हुने बताइएको छ । मतगणना समाप्त भएलगत्तै निर्वाचन परिणाम घोषणा हुने छ ।

एसोसिएसनले बेलायतस्थित नेपालीहरुलाई सदस्यता फाराम बुझाइ महाधिवेशन सफल पार्न आग्रह गरेको छ ।