ज्योति मगर १ जुनमा बेलायत आउने, साथमा बले र कक्रोज

लन्डन । करिब महिना दिनको सांगीतिक प्रस्तुति लिएर लोकगायिका ज्योति मगर आगामी १ जुनमा लन्डन आउने भएकी छिन् । ज्योतिको साथमा भद्रगोल सिरियलका बले र कक्रोज पनि आउने आयोजक सपन इन्टरटेनमेन्टले जनाएको छ ।

सपन इन्टरटेनमेन्ट लि. यूकेका प्रवन्धक सपनकुमार राईका अनुसार, ‘बबाल धमाका’ नाम दिइएको उनीहरुको पहिलो शो आगामी ४ जुनमा एम्पायर हल अल्डरसट, ११ जुनमा हकिङ कम्युनिटी सेन्टर फोकस्टोन र १९ जुनमा एजियन कम्युनिटी सेन्टर, प्लमस्टिडमा हुने तय भइसकेको छ भने बांकी शहरमा पनि कार्यक्रम बन्दैछ । राईले कार्यक्रममा सहभागिताका लागि बेलायतवासी नेपाली सबैमा आग्रह गरेका छन् ।

यसअघि पटक पटक भिजा रिफ्यूज भएर यूके आउन नपाएकी ज्योतिलाई पहिलो यूके ट्रिप विशेष हुनेछ ।

सपन इन्टरटेनमेन्ट लि. यूकेले यतिखेर भुवन केसी निर्देशित पहिलो फिल्म ड्रिम्स् प्रदर्शन गरिरहेको छ । भुवन र उनका सुपुत्र हिरो अनमोल केसीका साथ उक्त फिल्म बेलायतको अल्डरसट, उलवीच, ह्यारो र ग्रान्थाममा सफल प्रदर्शन भइसकेको छ भने मेडस्टोन र एवरडिनमा हुने क्रममा छ ।

मनोरन्जनात्मक कार्यक्रमका लागि सपन इन्टरटेनमेन्टको आफ्नै चिनारी छ । उक्त कम्पनीले झण्डै अढाइ दशक यता सयौं कलाकारलाई यूके झिकाइसकेको छ ।