प्रम ओलीद्वारा जापानी प्रमलाई समवेदना सन्देश

काठमाडौँ, ६ चैत । प्रधानमन्त्री केपी शर्मा ओलीले जापानी प्रधानमन्त्री शिन्जो आबेलाई एक समवेदना सन्देश पठाउँदै बिहीबार र शनिबार क्युशु टापू र कुमामोटो प्रान्तमा गएको विनाशकारी भूकम्पबाट भएको धनजनको क्षतिप्रति नेपाल सरकार र नेपाली जनताका तर्फबाट दुःख प्रकट गर्नुभएको छ ।

सन्देशमा उहाँले भूकम्पमा परी घाइते भएकाहरुको शीघ्र स्वास्थ्य लाभका साथै विनाशबाट पूर्ण उन्मुक्ति प्राप्तिको कामना पनि गर्नुभएको छ ।

गत वर्ष नेपालमा गएको भूकम्पपछि जापान सरकार र त्यहाँका जनताबाट प्राप्त मूल्यवान् सहायताको स्मरण गर्दै उहाँले दुःखको यस घडीमा नेपाली जनता जापानी जनताको साथमा रहेको विश्वास पनि दिलाउनुभएको छ ।