लन्डनको पशुपति मन्दिरमा टीका

लन्डन । साउथ इष्ट लन्डन, प्लमस्टिडमा अवस्थित युरोपकै पहिलो पशुपतिनाथ मन्दिरमा बिहीबार टीका कार्यक्रम भएको छ ।

पंण्डित निलहरी घिमिरे र विनोद पन्थीले भक्तजनहरुलाई टीका र जमरा प्रदान गरेका हुन् ।

बिहान ८. ५५ को शुभ साइतबाट टीका लगाउन शुरु गरिएको थियो । मन्दिरमै राखिएको जमरा र टीका लगाउन पाउंदा सहभागी हर्षित देखिन्थे । उनीहरुले विदेशमा समेत यस्तो परम्परा कायम गरिनुलाई प्रशंसनीय बताए ।

मन्दिर व्यवस्थापनले स्थापनाकालदेखि नै मन्दिमा टीका लगाउने परम्परा शुरु गरेको हो । मन्दिरले पूर्णिमासम्म हरेक दिन बिहान ११ सम्म र बेलुका ५ देखि ८ बजेसम्म टीका कार्यक्रम कायम रहने जनाएको छ ।

टीका कार्यक्रममा मन्दिर व्यवस्थापन समितिका अध्यक्ष बालजंग अर्याल, ट्रष्टी सदस्य विनोद ज्ञवाली, सदस्य हरि पन्त, श्रीमति सरिता गिरी लगायतले सहयोग गरेका थिए ।

विगत वर्षमा व्यवस्थापनमा केही कमी कमजोरीको आरोप खेपेको मन्दिरले यसपटक भने प्रशंसनीय काम गरेको सहभागीले बताएका थिए । तस्विरहरुः कुशल श्रेष्ठ