एएफसी यु १९ छनोट प्रतियोगितामा नेपालको लज्जास्पद हार

काठमाडौँ, १६ असोज । एसियाली फुटबल महासङ्घ उन्नाइस वर्षमुनि (एएफसी यु १९) छनोट प्रतियोगितामा नेपालले हज्जास्पद हार व्यहोरेको छ ।

गएराति भएको एकतर्फी खेलमा नेपाली टोली आयोजक इरानसँग १०–० गोल अन्तर भोग्न बाध्य भयो । नेपालमाथि दबाब सिर्जना गरेको इरानले मध्यान्तर अघि ५ र मध्यान्तर पछि पनि समान गोल गरेको थियो ।

गत महिना मात्र यु १९ साफ च्याम्पियनसिप उपाधि जितेको नेपाली टोलीको यो प्रदर्शन अपेक्षा विपरीत हो । समूह ‘इ’मा रहेको नेपाललाई खेलमा फर्कने अवसरका लागि अझैँ दुई खेल बाँकी छन् ।

नेपालले आइतबार कुवेतसँग र मङ्गलबार जोर्डनसँग प्रतिस्पर्धा गर्नेछ । प्रतियोगिताका समूह विजेता १० टोली तथा उपविजेता उत्कृष्ट पाँच टोलीले आगामी वर्ष वहराइनमा यु १९ एएफसी च्याम्पियनसिपमा खेल्ने अवसर पाउनेछन् ।